BALAA: Rooney agomea mkataba mpya Man United

 DUH! Imeshakuwa noma. Hii inaweza kuwa kauli ya mashabiki wa Manchester United baada ya straika wao aliyekwenda kiwango cha juu msimu huu, Wayne Rooney, kugomea mazungumzo ya kuongeza mkataba mpya na klabu hiyo.

Licha ya straika huyo kudaiwa kufurahia maisha ndani ya Old Trafford kwa sasa, bado dhamira yake ya kuihama Manchester United ipo palepale baada ya kushindwa kuondoka katika uhamisho wa majira ya kiangazi.

Ripoti iliyopatikana ni kwamba kambi ya Rooney imekataa ofa ya mabosi wa Manchester United wanaotaka mazungumzo ya kumbakiza fowadi huyo baada ya mkataba wake wa sasa kufikia tamati mwisho wa msimu huu.

Rooney ambaye baadaye mwezi huu atafikisha umri wa miaka 28, ameanza msimu akiwa kwenye kiwango bora kabisa, lakini amejipanga kuibua upya sakata la kuwahama mabingwa hao wa Ligi Kuu England na pengine ikiwezekana kwenye usajili wa Januari mwakani.

Mipango yake ni kwenda kupata changamoto mpya kwa kujiunga na klabu inayoshiri Ligi ya Mabingwa Ulaya, mahali ambapo atakuwa na uhakika wa kucheza kama straika wa kati. Kwa sasa tofauti na alivyokuwa chini ya Sir Alex Ferguson, Rooney anatumika akiwa mshambuliaji wa pili katika kikosi cha Manchester United kinachonolewa na kocha David Moyes.

Jumatano iliyopita akiwa kwenye kambi ya timu ya taifa ya England iliyokuwa ikijiandaa na mechi ya kufuzu Kombe la Dunia dhidi ya Montenegro iliyochezwa jana Ijumaa, Rooney aliulizwa kama atabaki kwenye kikosi cha Manchester United na alisema: “Kama unavyoona, kwa sasa nacheza na nafurahia soka langu. Nitakuwa na mazungumzo mazito na klabu na hado tutatazama kitakachotokea.”

Mabosi wa Manchester United bado hawana uhakika juu ya mchezaji huyo kubaki kwenye timu yao, huku wakala wake, Paul Stretford, akionekana kupiga chapuo ya kumhamisha kutoka Old Trafford. Manchester United iligoma kumuuza Rooney kwenda Chelsea, lakini sasa amekataa kuongeza mkataba mpya baada ya ule wa sasa unaomshuhudia akilipwa Euro 295,000 kwa wiki.

Julai mwaka huu, Mkurugenzi Mtendaji Mkuu mpya wa Manchester United, Ed Woodward, alidai hakuna haraka ya kufanya mazungumzo ya mkataba mpya wa Rooney, jambo ambalo kwa sasa tayari limeanza kuwashtua na kuona kwamba staa huyo ataondoka Old Trafford.

Arsenal na Paris Saint-Germain nazo zinafukuzia saini ya straika huyo wa kimataifa wa England.

TOA MAONI YAKO HAPA CHINI