Kibadeni amtimua Henry Joseph

 

Henry Joseph

KIUNGO wa Simba, Henry Joseph, ameondolewa katika kambi ya Simba huku Ramadhan Chombo ‘Redondo’ akirudishwa kikosi cha pili.

Habari za uhakika ambazo Mwanaspoti imezipata, zinasema Henry ambaye amesajiliwa na Simba msimu huu huku akilipwa mshahara wa Sh1.5 milioni, alikorofishana na kocha wake, Abdallah Kibadeni, Jumatatu wiki hii katika mazoezi ya asubuhi yaliyofanyika katika  Uwanja wa Kinesi, Dar es Salaam.

Henry anayemudu kucheza nafasi ya ulinzi na kiungo, alirudi nchini mwaka huu akitokea klabu ya Kongsvinger ya Norway iliyoshuka daraja.  Kurejea kwake kumetokana na kukataa mkataba mpya wa klabu hiyo wenye pesa kiduchu baada ya timu kuyumba kiuchumi.

Jumatatu wiki hii, wakati Simba ikiwa katika mazoezi ya asubuhi kabla ya kuondoka jioni yake kwenda kambini Bamba Beach, Henry alifanya mazoezi ya kukimbia pekee yake na baadaye wachezaji wote walipofika uwanjani Kibadeni aliwataka wakimbie kwa pamoja, lakini Henry inadaiwa aligoma kwa madai kuwa alikuwa tayari ameshafanya mazoezi ya peke yake.

Hata hivyo, Henry alipozungumza na Mwanaspoti jana Jumatano, alikanusha vikali madai hayo na kusema kuwa hawezi kufanya kitendo kama hicho maishani mwake kwani anaheshimu wajibu wake.

“Sijawahi kufanya utovu wa nidhamu kwa kocha. Nilifika pale saa 11 alfajiri, nilikuwa wa kwanza. Nikafanya mazoezi ya kukimbia pekee yangu ili kujiweka fiti kwa sababu muda mwingi nilikuwa majeruhi. Baadaye wenzangu walipofika nikajumuika nao, lakini Julio (Jamhuri Kihwelu) akaniambia nipumzike kwani nimechoka,” alisema Henry.

Alisema alivyoambiwa hivyo alimfuata Kibadeni kumwambia kuwa ameambiwa na Julio apumzike na baada ya hapo akawa amekaa nje ya uwanja huku wenzake wakiendelea na mazoezi.

“Nilishangaa wakati Kibadeni anatangaza kikosi cha kuingia kambini Bamba Beach, alisema sitakwenda na timu, badala yake nikafanye mazoezi ninayoyajua mimi na kwamba akinihitaji ataniita,” alisema Henry.

Alisema anamheshimu kila mtu na kwamba katika maisha yake amejitahidi kufuata misingi na nidhamu ya soka na ndio maana bado haelewi kisa kilichotokea mpaka Kibadeni kuamua kumuacha.

Henry alisema ili kujiweka fiti, ameendelea kufanya mazoezi asubuhi na jioni na wakati mwingine amekuwa akienda gym, lakini kwa sasa hayupo katika mazoezi ya Simba.

Mwanaspoti ilimtafuta Kibadeni kuzungumzia hilo na alilisukuma suala hilo kwa Kocha Msaidizi, Jamhuri Kihwelu ‘Julio’ ambaye majibu yake hayakuwa ya moja kwa moja, lakini yalitosha kuthibitisha.

Julio alisema kila mchezaji anatakiwa kuwa na nidhamu na kujituma katika mazoezi na kwenye mechi na asiyefanya hivyo hurudishwa kikosi cha pili.

TOA MAONI YAKO HAPA CHINI