HAWA NDO WANASOKA WA 5 WENYE THAMANI KUBWA KULIKO WENGINE WOTE KWENYE HII DUNIA

Unahisi ni mwanasoka gani mwenye thamani zaidi duniani?

Subiri, huna haja ya kuumiza kichwa. Supastaa wa Manchester City na timu ya taifa ya Ivory Coast, Yaya Toure, amepenya kwenye Kumi Bora ya wanasoka wenye thamani kubwa zaidi duniani kutokana na staa huyo kuingiza Dola 20 milioni kwa mwaka tangu alipotoka Barcelona na kuhamia England.

Hata hivyo, makala haya yanakuletea wanasoka watano bora wenye thamani kubwa zaidi duniani ambao bado wanatamba kwenye soka kwa sasa.

5. Andres Iniesta 

Thamani Dola 78 milioni

Kiungo fundi wa Barcelona na Hispania, Andres Iniesta anashinda kila kitu kwenye maisha yake ya soka. Jambo hilo na ubora wake wa ndani ya uwanja umempandisha thamani na kutajwa kuwa na thamani ya Dola 78 milioni.

Katika kuthibitisha thamani ya mchezaji huyo kuwa ni kubwa, klabu ya Barcelona imeweka kipengele cha kulipwa Dola 206 milioni kwenye mkataba wake kama kutakuwa na timu inahitaji huduma ya staa huyo.

4. Radamel Falcao

Thamani Dola 82 milioni

Klabu ya AS Monaco ya Ufaransa ililazimika kutumia pesa nyingi kuhakikisha inarudi kwa kasi na kuwa tishio kwenye Ligi Kuu Ufaransa.

Katika kulifanya hilo, Monaco ilizama mfukoni na kumnasa staa wa Colombia, Radamel Falcao, kutoka Atletico Madrid na kumpa mkataba wenye thamani ya Dola 82 milioni. Kwa sasa staa huyo ni majeruhi, lakini alifunga mabao tisa kwenye mechi 13 kuthibitisha thamani yake.

3. Lionel Messi 

Thamani Dola 118 milioni

Tuzo nne za Ballon d’Or kibindoni, jambo hilo limemfanya staa huyo wa Argentina kuweka kibindoni Dola 118 milioni. Wakati huo huo klabu ya Barcelona ipo kwenye mchakato wa kumpatia mkataba mpya mchezaji huyo ambao utakuwa mnono zaidi huku kwenye mkataba wake kumewekwa kipengele kinachohitaji ilipwe Dola 797 milioni kama kutakuwa na timu inataka kumsajili.

2. Gareth Bale

Thamani Dola 138 milioni

Kuondoka Tottenham Hotspur ni kitu kilichofanya tofauti kubwa katika maisha ya staa huyo wa kimataifa wa Wales kutokana na jambo hilo kumletea pesa nyingi. Winga huyo wa zamani wa Southampton ametua Real Madrid na kupewa mkataba wenye thamani ya Dola 138 milioni kwa maana ya kupokea Dola 487,000 kwa wiki.

Mara kadhaa amekuwa akihusishwa kwenye michezo ya kompyuta na kulifanya jina lake kuwa nembo kubwa katika wigo wa biashara.

1. Cristiano Ronaldo

 

Thamani Dola 150 milioni

Cristiano Ronaldo kwanza ni mwanasoka wa kwanza kufikisha wafuasi 50 milioni kwenye ukurasa wake wa Facebook. Lakini, kwenye kiwango cha pesa, staa huyo wa Real Madrid na Ureno anaripotiwa kuwa na kipato kinachofikia Dola 150 milioni. Ronaldo Januari mwaka huu alitwaa tuzo ya Mwanasoka Bora wa Mwaka wa Fifa kitendo ambacho kimemwongezea thamani zaidi.

TOA MAONI YAKO HAPA CHINI