VILE COACH WA CHELSEA JOSE MOURINHO HUWA HAKOSI LAKUSEMA,SOMA KILE ALICHO KISEMA AKIKILENGA KWA ARSENAL NA MAN-CITY

Jose Mourinho tena! Kwa mara nyingine katika ubora wake wa kuzungumza, amejaribu kuiaminisha dunia kile ambacho ni vigumu kwa watu wengine kukiamini na kukifikiria.

Bosi huyo wa Chelsea amesisitiza kwamba wapinzani wake katika Ligi Kuu England, Manchester City na Arsenal, wana nafasi kubwa ya kusonga mbele katika Ligi ya Mabingwa Ulaya kwa kuziondoa Barcelona ya Hispania na Bayern Munich ya Ujerumani.

Arsenal ilichapwa 2-0 na Bayern Munich katika uwanja wao wa nyumbani, Emirates, wiki mbili zilizopita huku Manchester City nao wakipoteza kwa idadi hiyo hiyo ya mabao pia nyumbani kwao, Etihad.

Hata hivyo, huku mashabiki wa timu hizo pengine na mashabiki wengine wa soka duniani wakiamini kwamba Arsenal na Man City hazina nafasi ya kusonga mbele, Mourinho anaamini kuwa timu hizo zina nafasi nzuri ya kutinga robo fainali.

“Man City haiwezi kuishinda Barcelona? Barcelona mbona ilipoteza kwa Valladolid, ilipoteza nyumbani pia mbele ya Valencia. Sasa kwanini isiweze kufungwa tena?” Alihoji Mourinho kwa kujiamini.

“Arsenal kwa Bayern inaweza kushinda 2-0 na kwenda dakika za nyongeza. Ngumu. Inaonekana ngumu sana, lakini nakwambia wanaweza.”

Wakati Mourinho, kocha mwenye maneno mengi, akiwapa moyo Arsenal na Man City, kocha wa Arsenal, Arsene Wenger, amedai kwamba mchezaji wake ghali zaidi katika historia ya Arsenal, Mesut Ozil, amerudi upya na ataonyesha ubora wake katika pambano dhidi ya Bayern.

Ozil alifunga bao moja na kupika mengine mawili wakati Arsenal ilipoichapa Everton Jumamosi na kutinga nusu fainali ya Kombe la FA.

“Alikuwa na hisia kwamba ameiangusha timu katika mechi muhimu, hilo liliathiri sana kiwango chake. Maumivu ya kisaikolojia ni makali kama yalivyo maumivu ya mwili. Inahitaji muda kuweza kuyaponya,” alisema.

Wakati Arsenal ikiwa wageni wa Bayern, katika mechi nyingine za leo Jumanne, Atletico Madrid itaikaribisha AC Milan baada ya pambano lao la awali kumalizika kwa sare ya 1-1 jijini Milan, Italia.

Kesho Jumatano achilia mbali pambano la Barcelona na Man City, Paris St Germain itakuwa nyumbani kuikaribisha Bayer Leverkusen baada ya kuwapiga Wajerumani hao mabao 4-0 wakiwa ugenini wiki mbili zilizopita.

TOA MAONI YAKO HAPA CHINI