HIZI NDIZO HISTORIA ZINAZO AMBATANA NA SIKU KAMA YA LEO YA ALHAMISI MEI 29 MWAKA 2014

Siku kama ya leo miaka 561 iliyopita sawa na tarehe 29 Mei 1453 ilikombolewa bandari ya Constantine iliyokuwa makao makuu ya Mfalme wa Roma ya Mashariki na vikosi vya Sultani Muhammad Fatih, mtawala wa dola ya Othmaniya. Amri ya kwanza iliyotolewa na Muhammad Fatih baada ya kuudhibiti mji huo ilikuwa ni kudhaminiwa usalama na uhuru wa wakaazi wake. Mfalme huyo alitoa amri ya kukarabatiwa mji huo na kujengwa msikiti, ambao leo hii unajulikana kwa jina la Msikiti wa Sultan Ahmed. Ilipofika mwaka 1930 mji wa Constantine ulibadilishwa jina na kuitwa Istanbul, na ni miongoni mwa miji muhimu zaidi ya Uturuki ulioko magharibi mwa nchi hiyo.

           ---------------------------------------------------------------------------

Miaka 25 iliyopita katika siku kama ya leo, inayosadifiana na tarehe 8 Khordad mwaka 1368 Hijiria Shamsia alifariki dunia Ayatullah Mir Sayyid Ali Fani Isfahani msomi wa Kiislamu. Alizaliwa katika mji wa Isfahan mwaka 1294 Hijira Shamsia na alianza kujifunza elimu ya msingi ya Kiislamu akiwa na miaka 9. Alimu huyo alistafidi na maulama wakubwa na kufikia daraja ya ijtihad ambapo alihamia Najaf nchini Iraq na kwa muda wa miaka 30 alifundisha kwenye mji huo masomo ya fikih, usul, ilmul qalam na akhlaq. Mwaka 1352 Hijria Shamsia alirejea Iran na kuendelea kufundisha mjini Qum. Miongoni mwa vitabu vya Ayatullah Mir Sayyid Ali Fani Isfahani ni Dastur Hajj wal Umrah, Fawaid Rijaliyah, Arubain Hadith na Tafsiri ya Suratul Faatiha.

-----------------------------------------------------------------------------

Siku kama ya leo miaka 61 iliyopita muwafaka na tarehe 29 Mei 1953, Edmund Hillary mpanda milima kutoka New Zealand na Tenzing Norgay mpanda milima kutoka Nepal walifanikiwa kufika kilele cha mlima Everest, ambao ni mlima mrefu zaidi duniani. Mlima wa Everest wenye urefu wa mita 8,848, ni kilele kirefu zaidi cha silsila ya milima ya Himalaya nchini Nepal. Baada ya Hillary na Norgay kufanikiwa kupanda mlima huo mwaka 1953, makundi mengine ya wapanda milima kutoka katika nchi nyingine duniani pia yaliweza kukwea kilele cha mlima huo katika miaka iliyofuata.

-------------------------------------------------------------------------------

Na Siku kama ya leo, miaka 556 iliyopita alifariki dunia huko mjini Aleppo, Syria Shamsud-Din, faqihi na mfasiri mkubwa wa Waislamu wa zama hizo. Shamsud-Din alisoma elimu ya fikihi na tafsiri ya Qur'ani kwa Ibn Hammam, faqihi na msomi mkubwa wa zama hizo. Aidha Shamsud-Din aliandika vitabu kadhaa katika uwanja wa mafundisho ya Kiislamu. Miongoni mwa vitabu vya msomi huyo, ni pamoja na kitabu kiitwacho "Al-taqrir wa al-Ta'abir."

TOA MAONI YAKO HAPA CHINI