WAZIRI WA MAMBO YA NJE WA MISRI AMEKUTANA NA MAWAZIRI WENZIE WA NCHI AMBAZO MTO NILE UNAPITA

Waziri wa Mambo ya Nchi za Nje wa Misri Nabil Fahmi amekutana katika nyakati tofauti na mawaziri wenzake wa Ethiopia, Tanzania na Angola mjini Cairo na kujadiliana nao kwa kina masuala yanayohusiana na pande mbili na nchi zote zinazopakana na Mto Nile.

Msemaji wa Wizara ya Mambo ya Nchi za Nje wa Misri amesema kuwa, mazungumzo hayo yamefanyika mjini Cairo wakati mawaziri hao waliposhiriki sherehe za kuapishwa Rais Abdulfattah al Sisi wa Misri. Badr Abdul'Atwii amesema kuwa, mazungumzo ya mawaziri hao yalisisitiza juu ya kubakia Mto Nile kama msingi wa mashirikiano ya nchi zote zinazochangia maji ya mto huo na kutafutwa njia zitakazozinufaisha nchi zote kwa maji ya mto huo bila ya kuathiri maslahi ya upande mwingine.

Mawaziri wa Mambo ya Nchi za Nje wa Tanzania, Ethiopia na Angola wamesisitiza suala la kurejeshwa uanachama wa Misri kwenye Umoja wa Afrika hasa baada ya kufanyika uchaguzi wa rais nchini humo.

Misri na Ethiopia zinavutana kuhusiana na matumizi ya maji ya Mto Nile, baada ya serikali ya Addis Ababa kuchukua uamuzi wa kujenga bwawa pambizoni mwa mto huo, hatua ambayo inapingwa mno na Cairo.

TOA MAONI YAKO HAPA CHINI