KINYOZI ANAE KULA PESA ZA BALE NA WENGINE MA STAR WA SOKA NA WAMUZIKI KWA KUWATENGENEZA NYWELE ZAO

MACHO ya Dunia ya wapenda soka yalitua kwa Gareth Bale siku aliyotambulishwa pale Real Madrid. Uhamisho wake wa kutoka Tottenham Hotspur umemfanya kuwa mchezaji ghali zaidi duniani kwa sasa, alipohamishwa kwa Pauni 85 milioni. Hilo ndilo lililowafanya mashabiki kusubiria kwa hamu utambulisho wake.

Bale, aliyekuwa ameandamana na familia yake ikiwamo mchumba wake, mrembo Emma Rhys Jones alijiandaa kwa tukio hilo ikiwamo kunyoa nywele zake vizuri.  Bale anaripotiwa kutumia Pauni sita (Sh15,000) kunyoa nywele zake siku hiyo kabla ya kwenda Santiago Bernabeu kutambulishwa.

Wahispaniola walipagawa baada ya kuona mtindo wa nywele alionyoa Bale, wakakimbilia saluni kutaka na wao wanyolewe kama alivyonyoa Bale. Hawakujali ilimgharimu kiasi gani Bale kutengeneza mwonekano huo wa nywele zake.

Si suala la gharama iliyotumika kwenye kunyoa. Bale hawezi kuingia kwa mastaa kama Jennifer Lopez, Jennifer Aniston, Rihanna, Michael Douglas, David Beckham, ambao wameingia kwenye rekodi ya kuwa watu walionyoa nywele zao kwa gharama kubwa zaidi.

Rihanna aliwahi kuny’oa nywele zake kwa Dola 2,000, wakati Beckham anaripotiwa kuwahi kutumia Dola 6,000 kwa ajili ya kunyoa tu. Lakini, unafahamu ni nani aliyemnyoa Bale?

Klabu mahasimu wa Ligi Kuu, Manchester United na Manchester City nyota wake wanaweza kupishana kwenye mambo mengi, lakini hilo haliwezi kuwa kwa kinyozi huyu. Hapo, wote wanazungumza lugha moja na kuweka uhasama wao kando. Unajua kwa nini?

Kinyozi huyo, Daniel Johnson, ndiye anayewapamba kwa mikato ya mitindo tofauti ya nywele zao. Kunyoa mastaa kumemfanya kuwa mtu maarufu sana England kwa sasa.

Mastaa wote unaowatamani kuwagusa japo unywele tu au kujaribu kuiga mitindo yao ya nywele, wananyoa kwa kinyozi Daniel. Kinyozi Daniel amekuwa maarufu kwa sababu ananyoa mastaa na watu mashuhuri wanaotamba kwenye muziki, soka, filamu na tasnia nyingine za uburudishaji.

Analipwa pesa ya nguvu, hebu fikiria tu kama Bale anamlipa Pauni 6, Wayne Rooney au Beckham, ambaye pia ni kinyozi wake, anamlipa kiasi gani?

“Nilimtazama Bale na kumbadili mwonekano wake kabisa,” alisema Daniel. “Hispania nzima ilichanganyikiwa na wao kwenda kunyoa wafanane na Bale. Nimekuwa kinyozi wa Bale kwa muda mrefu sana, mwonekano wake wa nywele ni kazi yangu, unaweza kuona kinyozi anavyobadili mwonekano wa mtu.”

TOA MAONI YAKO HAPA CHINI