T.P MAZEMBE YAONESHA UBABE WAO WAKIFEDHA,HUKU MOROCCO WAKIKOMAA

SIKU chache baada ya Fifa kuitaka Klabu ya TP Mazembe iwaruhusu wachezaji watatu wa Zambia kuiwakilisha timu yao ya Taifa, Mazembe wameonyesha jeuri ya fedha kwa kuwatumia ndege wachezaji hao.

Awali Fifa walitoa onyo kwa klabu hiyo ya Jamhuri ya Kidemokrasia ya Congo (DRC) ikiwataka iwaruhusu, Rainford Kalaba, Stopilla Sunzu na Nathan Sinkala kujiunga na timu ya Taifa ya Zambia kwa ajili ya mechi yao na Brazil hapo kesho Jumanne.

Jeuri hiyo ya fedha imekuja baada ya Mazembe kudai kuwa isingewaruhusu wachezaji hao kwenda Brazil kwa kuwa walikuwa wagonjwa na hivyo wasingeweza kuiwakilisha Zambia.

Alhamisi iliyopita, Daktari wa Mazembe, Tahar Messaoud, alisema kwamba Kalaba na Sinkala wanasumbuliwa na malaria wakati, Sunzu ana matatizo ya goti aliyoyapata wakati akiiwakilisha timu hiyo katika mechi ya nusu fainali ya kwanza ya Kombe la CAF dhidi ya Stade Malien ya Mali. Taarifa za daktari huyo zilisababisha Chama cha Soka Zambia (FAZ) kuomba Fifa waingilie kati suala hilo na kuwashutumu Mazembe kwa taarifa za uwongo kuhusu maradhi ya wachezaji hao.

“Tungependa kuwaarifu wadau wa soka kwamba tumepata taarifa kutoka Fifa ambao wamewaonya TP Mazembe kwa kupuuza taratibu zinazohusu kuwaruhusu wachezaji kushiriki mechi za kimataifa,’’  alisema Meneja Uhusiano wa FAZ, Erick Mwanza.

Mazembe walikuwa na mechi muhimu dhidi ya Malien na inadhaniwa kwamba hiyo ndiyo sababu ya kutunga habari hiyo ya kuwazuia wachezaji hao. Katika hatua nyingine, beki  wa Morocco, Abderrahim Achchakir aliyefungiwa mwaka mmoja na Fifa kwa kosa la kumzonga mwamuzi katika mechi ya kufuzu Kombe la Dunia 2014 dhidi ya Tanzania amekata rufaa katika mahakama ya masuala ya kimichezo.

Mahakama ya michezo ilibainisha Alhamisi iliyopita kwamba rufaa ya beki huyo itasikilizwa Novemba 5 mwaka huu. Achchakir alimzonga mwamuzi Helder Martins de Carvalho kutoka Angola na kusababisha kuonyeshwa kadi nyekundu katika mchezo uliomalizika kwa Tanzania kushinda mabao 3-1 jijini Dar es Salaam.

Kwenye adhabu hiyo, Fifa imemtaka Achchakir pia kulipa faini ya Dola 11,000 na kwamba adhabu hiyo itakwisha Mei mwakani kitendo kitakachomfanya akose michuano ya Ligi ya Mabingwa Afrika na klabu yake ya FAR Rabat

TOA MAONI YAKO HAPA CHINI