MA STAR WA SOKA 21 WAANZA KUTANGULIZA UTAMU BRAZIL 2014

PATI la mastaa watupu. Fikiria hapa kuna Eden Hazard, Robin van Persie, Wayne Rooney, Andres Iniesta, Lionel Messi, Radamel Falcao kule kuna Alexis Sanchez, Jozy Altidore, Shinji Kagawa, Mesut Ozil, Xherdan Shaqiri, Claudio Marchisio; hao ni baadhi tu. Halafu wataandamana na mademu wao.

Unadhani patakuwaje hapo Brazil mwakani, nchi yenye fukwe za maana. Hii ni kwenye fainali za Kombe la Dunia zitakazoanza Juni 12 mwakani. Supastaa Neymar atakuwa mwenyeji wao kwenye fainali hizo wakati atakapovaa jezi ya Brazil. Kwa mastaa kama Iniesta, Kagawa na Marchisio wameonja mazingira ya Brazil yalivyo baada ya miezi michache iliyopita kuwapo kwenye ardhi hiyo katika michuano ya Kombe la Mabara.

England baada ya kwenda Brazil kucheza mechi ya kirafiki na timu ya nchi hiyo, iliporudi kwao hadithi zilikuwa kile walichokiona kwenye fukwe za Kibrazili na baada ya kufuzu fainali za Kombe la Dunia za mwakani, kitu cha kwanza mashabiki wao kuulizia ni gharama za kuishi Copacabana.

Fainali za Kombe la Dunia zitakazofanyika Brazil mwakani zimepata mvuto wa aina yake baada ya mataifa mengi makubwa na yenye nguvu kisoka kufuzu. Jambo hilo litavuta watazamaji wengi kushuhudia mikiki mikiki hiyo.Uwepo wa mataifa makubwa kwenye fainali hizo ndicho kitu kinachotoa imani kwamba ushindani utakuwa mkubwa na mashabiki duniani kote watapata fursa ya kushuhudia soka yenye hadhi kubwa.

Nchi zilizofuzu kwenda Brazil

Timu 32 ndizo zitakazoshiriki michuano hiyo, lakini hadi sasa ni 21 tu ndizo zilizofuzu. Kwenye Bara la Ulaya, tayari nchi tisa zimeshafuzu moja kwa moja na nne zinasubiri kucheza mchujo ili kupata idadi ya timu 13 zitakazofuzu kutoka barani humo.

Ubelgiji, Italia, Ujerumani, Uholanzi, Uswisi, Urusi, Bosnia, England na Hispania. Timu hizo zitaungana na timu nne nyingine zitakazopatikana baada ya mechi ya mchujo utakazohusisha timu za Croatia, Sweden, Romania, Iceland, Ureno, Ukraine, Ugiriki na Ufaransa.

Amerika Kusini; Brazil wamefuzu moja kwa moja kwa sababu ya kuwa wenyeji, wakati nchini nyingine kutoka bara hilo ni pamoja na Argentina, Colombia, Ecuador na Chile.  Kwenye orodha hiyo kuna timu moja hapo imekosekana ambayo itasubiri kucheza mchujo wa mechi itakayohusisha na bara lingine.

Ili kukamilisha idadi kamili ya timu zitakazofuzu kupitia bara hilo, Uruguay italazimika kucheza mechi na Jordan kutoka Bara la Asia ili kupata tiketi moja iliyobaki.

Kwa upande wa Amerika Kaskazini na Kati; Marekani, Costa Rica na Honduras zimefuzu moja kwa moja, wakati Mexico italazimika kucheza na New Zealand ili kufuzu, kinyume cha hilo, basi mastaa kama Javier Hernandez ‘Chicharito’ na Giovani Dos Santos watakuwa miongoni mwa wachezaji watakaokosekana.

Japan, Australia, Iran na Korea Kusini zenyewe muda mrefu tayari zilishafuzu fainali hizo, wakati Bara la Afrika hadi kufika mwishoni mwa Novemba timu tano zitakazowakilisha bara zitakuwa zimepatikana.

TOA MAONI YAKO HAPA CHINI