Picha za Sonko na Shebesh zazua mjadala mtandaoni

HISIA mbalimbali zimezidi kuibuka miongoni mwa Wakenya kufuatia picha zenye utata za mwakilishi wa wanawake pamoja na seneta wa kaunti ya Nairobi, zinazoendelea kusambazwa kupitia mitandao ya kijamii.

Wakenya walitumia umahiri wao wa kimtandao kwa kutuma jumbe na hata kutumia vibonzo vinavyowasawiri viongozi hao kwa njia ya kuwakebehi na kuwasuta Huku hayo yakijiri, mwakilishi wa wanawake katika kaunti ya Nairobi na ambaye amekuwa akigonga vichwa vya habari huku akiandamwa na kashfa moja baada ya nyingine, ameendelea kusalia kimya huku picha zake zinazolenga kumuumbua zikizidi kusambazwa kupitia mitandao ya kijamii katika siku za hivi majuzi.

Akizungumza Ijumaa katika kikao kilichoandaliwa kwa madhumuni ya kujadili jinsi ya kupunguza adhari ya majanga, Bi Rachel Shebesh alikataa kujibu maswali yoyote kuhusiana na picha hizo zenye utata na kusisitiza kwamba mada ya siku iliyokuwa 'Ulemavu na Janga’ ijadiliwe badala yake.

Kusambazwa kwa picha kupitia ulingo wa mitandao ya kijamii kumeibua kashfa mpya dhidi ya viongozi hao wawili wa Nairobi.

Picha hizo ambazo zimekuwa zikienezwa kupitia mitandao ya kijamii zinawasawiri Bi Shebesh na Mike Mbuvi kama walio zaidi ya wandani wa kisiasa.

Katika mahojiano yaliyofanyika hivi majuzi, Mike Mbuvi, ambaye ni seneta wa Nairobi na aliye maarufu kama 'Sonko’, alidai kuwa picha hizo si za kweli na kwamba zilikuwa zimefanyiwa ukarabati kielektroniki.

 Alipoulizwa iwapo picha hizo zitazua hoja ya uadilifu dhidi ya wawili hao, seneta alisema picha hizo hazingewaathiri kwa vyovyote kama viongozi wa Nairobi.

Hata hivyo, alikiri kwamba wawili hao wamekuwa na tofauti za kibinafsi.

Kofi

Katika siku za hivi majuzi, viongozi hao wa Nairobi wamekuwa wakigonga vichwa vya habari kwa habari kwa yote yasiyokuwa sawa.

Katika kisa cha kwanza, Gavana wa Nairobi, Evans Kidero alidaiwa kumzaba kofi Shebesh katika malumbano kuhusiana na wafanyakazi wa kaunti walikuwa katika mgomo.

Siku chache baadaye, Sonko na Bi Shebesh wanadaiwa kukabiliana katika hoteli mojawapo Nairobi na pia katika majengo ya bunge ambapo Sonko anadaiwa vilevile kumzaba kofi Bi Shebesh.

Alikijibu kuhusiana na mafarakano yake na Bi Shebesh, Sonko alinukuliwa kusema kwamba matukio hayo ni sehemu ya “changamoto nyingi” zinazoambatana na maisha na uongozi.

“Hata wewe wakati mmoja au mwingine umewahi kutofautiana na dadako. Kutofautiana ni changamoto ambalo halikumbi magari au miti; huwakumba binadamu na lilinikabili mimi,” Sonko alinukuliwa akisema.

TOA MAONI YAKO HAPA CHINI