Ruto kurudi Kenya ili Uhuru aende Ethiopia

NAIBU wa Rais William Ruto, anatarajiwa kurudi nchini kutoka The Hague, mwishoni mwa wiki kwa sababu Rais Uhuru Kenyatta, ataondoka kwenda Addis Ababa kuhudhuria kikao  maalumu cha Muungano wa Afrika.

Bw Ruto ataondoka The Hague, Uholazi baada ya kesi inayomkabili kuahirishwa wikendi.

Hata hivyo, anapasa kurejea Jumatatu kwa sababu kesi haiwezi kuendelea asipokuwa mahakamani. Majaji walikataa rufaa yake ya kutaka aruhusiwe kutohudhuria baadhi ya vikao binafsi kiongozi wa mashtaka wa mahakama hiyo Bi Fatou Bensouda alipopinga ombi hilo akidai mshtakiwa akikosa kortini, kesi haitaendeshwa inavyopaswa.

Kesi ya Bw Ruto na aliyekuwa mtangazaji Bw Joshua Sang, imepangwa kuendelea hadi Novemba 1, ili kupisha inayomkabili Rais Uhuru Kenyatta Novemba 12.

Hata hivyo, mahakama haijaamua ikiwa kutakuwa na kikao kingine mwaka huu kama upande wa mashtaka ulivyoomba.

Hapo Alhamisi, mawakili wa Bw Ruto waliendelea kumhoji shahidi wa pili nambari 326, ingawa sehemu kubwa ya kikao hicho iliandaliwa faraghani. Baadaye mawakili wa Bw Sang watamhoji shahidi huyo. Upande wa mashtaka pia utamhoji kabla ya kukamilisha ushahidi wake. Rais Kenyatta amenukuliwa akisema kwamba kikatiba, hafai kuwa nje ya nchi wakati mmoja na naibu wake, madai aliyotumia alipokosa kuhudhuria kikao cha Baraza la Usalama la Umoja wa Mataifa.

Rais Kenyatta pia alikosa kuhudhuria kikao jijini Brussels September 16 kuhusu hali ya usalama katika upembe wa Afrika, kutokana na mzozo wa Somalia kwa sababu Bw Ruto alikuwa The Haque.

Rafiki wa korti

Wakati huo huo, Mahakama ya Kimataifa ya Uhalifu (ICC) ilikataa ombi la raia wa Kenya Bi  Moraa Gesicho aliyetaka kushirikishwa katika kesi dhidi ya Rais Kenyatta kama rafiki wa korti.

Mahakama hiyo ilisema Bi Gesicho hana ujuzi wa kuchaganua ripoti ya Tume ya Uchunguzi wa Ghasia za baada ya Uchaguzi (CIPEV), inayofahamika kama ripoti ya Waki. “Fauka ya hayo, mahakama hii haidhani kwamba kushirikishwa kwake kutakuwa na manufaa katika kuchaganua ripoti hiyo. Kwa msingi huu, mahakama hii haidhani kwamba uchaganuzi unaokusudiwa utahitajika katika kuamua kesi hii,” majaji  Kuniko Ozaki, Robert Fremr na Chile Eboe-Osuji walisema kwenye uamuzi wao.

Bi Gesicho aliwasilisha ombi lake Septemba  9 akitaka ashirikishwe kama rafiki wa mahakama akisema alikuwa tayari kujitolea kufanya utafiti kuhusu ripoti ya Waki, ikiwa mahakama ilihitaji ripoti hiyo.

TOA MAONI YAKO HAPA CHINI