Wabunge wakemea Bw Annan kwa kuunga mkono ICC

BAADHI ya wabunge wametaja hatua ya aliyekuwa mpatanishi mkuu nchini Kofi Annan ya kuitetea Mahakama ya Kimataifa ya Uhalifu (ICC) kama 'isiyofaa’ na kumkashifu kwa kuja nchini mmamo 2008 kuendeleza ajenda ya mahakama hiyo, iliyobuniwa chini ya Mkataba wa Roma.

Wabunge hao walisisitiza kauli za viongozi wengi wa Kiafrika kuwa ICC inalenga kuyaadhibu mataifa ya Kiafrika, kwani haijawashtaki wachochezi wa ghasia katika nchi nyingine, ambako maelfu ya watu wameuawa

“Huu ni utaratibu mbaya na tunapaswa kujiuliza maswali kadha;  kama ni kuhusiana na rangi ya ngozi zetu, utofauti katika jamii zetu, ni kigezo gani ambacho ICC hutumia kuorodhesha makosa kama uhalifu dhidi ya ubinadamu, na inayopaswa kuyaacha,” akasema Kiongozi wa Wengi Bungeni Bw Aden Duale.

Huku akiandamana na wenyekiti wa kamati za Ulinzi na Mahusiano ya Nje na ile ya Usalama wa Kitaifa, wabunge 15 wa mrengo wa Jubilee na wabunge Joseph Nkaissery na Victor Munyaka kutoka Cord, Bw Duale alisema kuwa hoja iliyo Bungeni kuhusu kesi zinazoendelea katika mahakama ya ICC hazina athari zozote kwa kesi hizo.

Kiongozi huyo wa Wengi alisema kuwa ataendeleza harakati zake za  kushinikiza kufanyiwa mageuzi kwa Sheria ya Uhalifu wa Kitaifa ambayo yanalenga kuiondoa Kenya kutoka uanachama wa Mkataba wa Roma, kama ilivyopendekezwa na Bunge mnamo Septemba 5 katika kikao cha maalum.

Wiki moja

Alisema kuwa amekuwa akiutayarisha mswada huo, na utakuwa tayari kuwasilishwa Bungeni katika muda wa wiki moja au mbili zijazo.

Alidokeza kuwa uamuzi uliopitishwa katika Kongamano la Muungano wa Afrika mjini Addis Ababa vile vile haungeathiri kesi hizo.

Alisema kuwa idara ya sheria nchini ni thabiti na haitaruhusu taasisi yoyote kutoka nje kuiingilia Kenya.

TOA MAONI YAKO HAPA CHINI