Zimbabwe kuunga mkono nchi za Afrika zijiondoe ICC

Rais wa Zimbabwe Robert Mugabe

ZIMBABWE imesema kuwa itaunga mkono mwito wa mataifa ya Afrika kujiondoa kutoka Mahakama ya Kimataifa ya Uhalifu (ICC) katika Kongamano la Muungano wa Afrika (AU) linarotarajiwa kufanyika wikendi hii nchini Ethiopi

Nchi hiyo wa Kusini mwa Afrika ilitia saini Mkataba wa Roma, ambao uliibuni ICC, lakini haijauidhinisha kisheria, hali inayomaanisha kuwa haidhibitiwi na maamuzi ya mahakama hiyo.

Waziri wa Haki Bw Emmerson Mnangagwa mnamo Alhamisi aliilaumu ICC kwa kuwalenga viongozi wa Kiafrika, huku ikikosa kuwachukulia hatua viongozi wa Kimagharibi.

“Historia imetufunza kuwa ukoloni ulikuwa mataifa ya bara Uropa kututawala,” akasema. “Sasa inatuhitaji tena kwenda katika nchi zizo hizo kushtakiwa huko, na waliokuwa wakoloni wetu. Hilo haliwezekani,” akaeleza waziri huyo.

“Hatujadiliani hata kuhusu Mkataba huo (wa ICC). Sidhani kuwa unaweza kupata uungwaji mkono wowote nchini humu,” akaeleza.

Hata hivyo, baadhi ya wakosoaji wa Rais Mugabe wamekuwa wakisema amekuwa akikataa kung’atuka uongozini kutokana na hofu kuwa huenda akatolewa kibali cha kukamatwa na mahakama hiyo kutokana na madai ya dhuluma za haki za kibinadamu.

Bw Mnangagwa alisema kuwa Zimbabwe ilitaka Afrika 'kusimama kidete na kupinga’ ubaguzi wa ICC dhidi ya bara la Afrika.

“Viongozi wa Kimagharibi huwa hawaulizwi, hali iliyo kinyume barani Afrika, angalia nchini Kenya, wanawachukua Rais Uhuru Kenyatta na naibu wake, ambao walichaguliwa na Wakenya, na kuwataka kuskizwa kwa kesi (Mjini The Hague),” akasema.

Rais Kenyatta na naibu wake William Ruto wanakabiliwa na kesi katika mahakama hiyo kwa madai ya kuhusika katika ufadhili wa ghasia za baada ya uchaguzi wa 2007, ambapo watu zaidi ya 1,000 waliuawa.

Kongamano hilo la AU linaanza mnamo Ijumaa, ambapo Rais Mugabe, ambaye amekuwa akiipinga ICC anatarajiwa kuhudhuria.

Bush

“Kwa sasa tumegundua kuwa hicho ndicho chombo ambacho kimekuwa kikitumiwa dhidi ya viongozi wa Kiafrika kinyume na wahalifu kama George Bush (aliyekuwa Rais wa Amerika) na Tony Blair (aliyekuwa Waziri Mkuu wa Uingereza),” akaeleza waziri huyo.

“George Bush aliivamia Iraq kwa visingizio vya kuwepo kwa silaha za maangamizi ya halaiki, na ningali siamini kuwa mashirika ya kijasusi ya CIA na FBI hayakujua kuwa hakukuwa na silaha hizo. Walitumia hilo kama hadaa ya kuhalalisha uvamizi wao,” akasema.

“Walimnyonga Saddam Hussein baadaye…tukio sawia na lililomfanyikia aliyekuwa kiongozi wa Libya, Muammar Gaddaffi, aliyeuawa na magenge yayo hayo kwa sababu tu mataifa hayo yana mafuta na hakuna yeyote anawachukulia hatua za kisheria George Bush au Tony Blair, ama viongozi wengine walioendesha dhuluma kama hizo,” akaeleza.

TOA MAONI YAKO HAPA CHINI