BAAZI YA VIONGOZI WA AFRICA WAKO MJINI JUBA KUJADILI MGOGORO UNAO ENDELEA NCHINI HUMO

Wakuu wa nchi kadhaa za Mashariki mwa Afrika wanakutana leo katika mji mkuu wa  Sudan Kusini, Juba kwa lengo la kutafuta njia za kutatua mgogoro wa nchi hiyo.

Baada ya hapo, siku ya Ijumaa, mji mkuu wa Kenya, Nairobi utakuwa mwenyeji wa mkutano wa viongozi wa Halmashauri ya Kiserikali ya Maendeleo (IGAD), ambayo ni jumuiya ya baadhi ya nchi za Mashariki mwa Afrika. Hayo yamedokezwa na afisa wa Wizara ya Mambo ya Nje ya Kenya Karanja Kibicho ambaye ameongeza kuwa Rais Salva Kiir wa Sudan Kusini anatazamiwa kuhudhuria mkutano huo ambao utajadili mgogoro wa nchi yake.

Tayari wakuu wa Umoja wa Afrika na IGAD wametoa wito kwa pande husika katika mgogoro wa Sudan Kusini kuanza mazungumzo kwa lengo la kumaliza vita vya ndani nchini humo. Rais wa Sudan Kusini amesema yuko tayari kufanya mazungumzo ya kumaliza vita vya ndani nchini humo ambavyo vimepelekea mamia ya watu kuuawa katika kipindi cha siku 10 zilizopita. Naye kiongozi wa uasi mpya Sudan Kusini Riek Machar, ambaye aliwahi kuwa makamu wa rais, amesema yuko tayari kwa mazungumzo lakini anataka Kiir aondoke madarakani kutokana na kile anachodai kuwa ni udikteta.

TOA MAONI YAKO HAPA CHINI