MZEE MKONGWE RYAN GIGGS AOMBA LIGI KUU YA ENGLAND KUPUMZIKA KWA WIKI MBILI

KIUNGO veterani wa Manchester United, Ryan Giggs, amesema kuna ulazima wa Ligi Kuu England kupumzishwa kwa wiki mbili Januari mwakani ili kuzisaidia klabu za nchi hiyo kufanya vyema kwenye michuano ya Ulaya na timu ya taifa itakayocheza fainali za Kombe la Dunia nchini Brazil.

Giggs, ambaye ni mzoefu wa kipindi kigumu cha mechi nyingi kwenye Ligi Kuu England inapofika mwisho wa mwaka, alisema jambo hilo linawafanya wachezaji kuchoka na hivyo kushindwa kutamba kwenye michuano ya Ulaya wanapomenyana na wenzao ambao walipata muda wa kupumzika.

Kwingineko kwenye ligi kubwa Ulaya kama Ujerumani, Italia, Hispania na hata Ufaransa, ligi zinasimama unapoingia Mwaka Mpya.

Ujerumani, ligi zinapumzika kwa wiki tano, wakati Ufaransa wachezaji wanapewa mapumziko ya wiki tatu ili kujipanga vyema, huku Hispania na Italia kumekuwa na mapumziko kwa kipindi cha Mwaka Mpya.

Giggs alisema: “Kwa mapato ya televisheni ni mazuri kwa sababu viwanja huwa vinajaa sana. Lakini hilo linaweza kuiathiri timu ya taifa.

“Unapokuwa mapumziko inasaidia sana na hata kwenye Ligi ya Mabingwa Ulaya utakwenda ukiwa fiti. Nadhani kuna ulazima wa ligi kuwa na mapumziko kinapofika kipindi cha majira ya baridi.”

TOA MAONI YAKO HAPA CHINI