NAFIKIRIA KUBADILI TABIA YANGU:Balotelli

SUPASTAA wa soka, Mario Balotelli, amesema ataanza kufanyia kazi suala la kupunguza jazba ndani ya uwanja ili kunusuru maisha yake ndani ya San Siro

Fowadi huyo wa AC Milan, amesema dhamira yake kwa sasa ni kuhimili purukushani zote za ndani ya uwanja ili kukwepa adhabu zinazoepukika ambazo zimekuwa zikiigharimu klabu yake.

Straika huyo amehusishwa na matukio mengi ya utovu wa nidhamu ndani ya uwanja msimu huu na hivi karibuni alidaiwa kulumbana na Nicolas Spolli juu ya suala la kibaguzi kwenye mechi dhidi ya Catania, licha ya kwamba beki huyo alisafishwa kwamba hakufanya tukio lolote la ajabu.

Baada ya kuona mambo yanazidi kumwandama, staa huyo wa zamani wa Manchester City, ameahidi kubadili tabia na kwamba atakuwa mchezaji mwenye nidhamu kubwa ndani ya uwanja hasa akizingatia dhamira yake ni kubaki kuwa mchezaji wa AC Milan.

“Ukilinganisha na miaka ya nyuma, mambo mengi sana yamebadilika. Nitaendelea kubadili tabia. Lakini, kubwa nitaendelea kubaki hapa,” alisema.

Balotelli alisifu mbinu za makocha wake wanazotumia kwa sababu zimemfanya kuwa tofauti hadi kufikia sasa kwenye maisha yake ya soka na anasisitiza kwamba ataendelea kuboresha na kupandisha kiwango chake kiuchezaji.

Hadi kufikia sasa, Balotelli amepita chini ya mikono ya makocha watatu makini; Roberto Mancini, ambaye mwenyewe anamtambulisha kama baba, Jose Mourinho, mhamasishaji na Massimiliano Allegri, anayemtambua kama mchezaji mwenzake.

TOA MAONI YAKO HAPA CHINI