BILA KUCHELEWA WAZIRI MKUU WA AFRICA YA KATI AUNDA SERIKALI

André Nzapayeke, Waziri Mkuu mpya wa Jamhuri ya Afrika ya Kati ametangaza baraza jipya la mawaziri la serikali ya muda ya nchi hiyo iliyokumbwa na machafuko. Waziri Mkuu wa Jamhuri ya Afrika ya Kati amewabakisha mawaziri wengi waliokuweko katika serikali iliyopita ya Rais Michel Djotodia. Aidha katika baraza hilo jipya la mawaziri, Waziri Mkuu Andre Nzapayeke amemteua waziri mmoja kutoka katika kundi la waasi wa Kikristo wa Anti-Balaka wanaoendesha mauaji dhidi ya Waislamu wa nchi hiyo.
Serikali hiyo inaundwa na mawaziri 20. Aidha wanawake saba ni miongoni mwa mawaziri wanaounda baraza hilo jipya la mawaziri ambalo linakabiliwa na changamoto kubwa ya kurejesha amani na uthabiti nchini humo. Mawaziri wawili wa Wizara ya Huduma za Jamii na ile ya Ujenzi wa Miji wanaohesabiwa kuwa watu wa karibu wa Michel Djotodia aliyelazimika kujiuzulu kutokana na mashinikizo ni miongoni mwa mawaziri waliobakishwa katika baraza hilo jipya la mawaziri.

TOA MAONI YAKO HAPA CHINI