HAWA NDO MAJEMBE 5 WANAO SAKWA NA COACH DAVID MOYES WA MAN-UTD

MARCO Reus, Ilkay Gundogan, Fabio Coentrao,Paul Pogba na Arturo Vidal ni majina yanayotajwa sana kwenye korido la Manchester United kwa sasa.

Pogba kabla hajatoka Man-utd na baadae kufukuzwa

Ni wachezaji ambao kocha David Moyes anahitaji kuwa nao Man United ili kukifanya kikosi hicho kuwa na nguvu mpya katika kunusuru msimu wao kwenye Ligi Kuu England.

Lakini, kabla ya kuwanasa wachezaji hao, ukiweka kando ahadi ya mishahara mikubwa watakayolipwa Man United ina kazi moja kubwa ya kuifanya kama wanahitaji hilo litokee, kwanza ni kuhakikisha Wayne Rooney anasaini mkataba mpya na Robin van Persie anapona na kurudi uwanjani.

Bila ya kutatua matatizo hayo mawili, Moyes atakuwa kwenye wakati mgumu sana kunasa wachezaji hao wa daraja la juu kikosini kwake. Rooney na Van Persie ni silaha tosha za kuwavuta mastaa hao, bila ya kujali jina la Man United.

Arturo Vidal wa Juventus

Kwa misimu mitano iliyopita, Rooney amefunga mabao 85 katika mechi 137 za Ligi Kuu England. Kwa kipindi hicho, Van Persie amefunga mabao 90 kwenye mechi 128 za Ligi Kuu.

Mastaa hao wana nguvu sana, kama Rooney na Van Persie hawapo kwenye timu, Man United inakuwa si timu ya ushindi kwenye Ligi Kuu ukiweka kando Ligi ya Mabingwa Ulaya. Kama watakuwa fiti na kisha unakuwa na watu kama Reus na Gundogan, unakuwa na timu makini sana.

Moyes anataka kumrudisha Pogba, aliyehamia Juventus kwa sababu za kutibuana na Sir Alex Ferguson. Kwenye orodha hiyo, yupo pia Vidal ambapo kama nyota hao wote wakitua Old Trafford basi kikosi hicho kitakuwa hakishikiki.

Paul Pogba Mfaransa wa Juventus

Ukiweka kando kipaji kipya kwenye kikosi hicho cha Adnan Januzaj, ukweli wa Man United ni Rooney na Van Persie.

Lakini, Rooney, anayelipwa Pauni 250,000 kwa wiki, ambaye kwa sasa yupo Misri na familia yake kwa mapumziko, kuna uwezekano akaondoka mwisho wa msimu kama hatasaini mkataba mpya na timu ikashindwa kunasa nafasi nne za mwanzo kwenye ligi.

Tangu alipoanza kuwindwa na Chelsea, hatima ya staa huyo ndani ya Old Trafford imekuwa shakani. Lakini wakati hilo likiendelea, Moyes na benchi lake la ufundi wapo ‘bize’ kusaka nyota wapya.

Fabio Coentrao wa R.Madrid

Jumapili iliyopita, Moyes alionekana Italia kwenye mechi ya Juventus, ambayo wanacheza Vidal na Pogba. Jana Jumanne, Moyes alikuwa jukwaani Ufaransa kwenye mechi kati ya PSG na Bordeaux kutazama nyota mpya wa kumsajili ingawa haikufahamika alikwenda hapo kumtazama mchezaji gani.

Kuna wachezaji kadhaa wanahusishwa na Man United, akiwamo straika wa PSG, Zlatan Ibrahimovic. Moyes alikwenda uwanjani, Stade Chaban Delmas, lakini Zlatan hakufunga na badala yake Javier Pastore, Adrien Rabiot na Blaise Matuidi walitisha wakati bosi huyo wa Man United akiwa jukwaani kuwatazama.

Moyes apiga ruti angani

Marco Reus kutoka Dortmund

Jumapili iliyopita, Moyes alipanda ndege hadi Italia kushuhudia Juventus ikimenyana na Cagliari, wakati ikiwa haijawekwa wazi ni nani aliyekwenda kumtazama, saa 48 baadaye alisafiri hadi Ufaransa na kuonekana uwanjani kwenye mechi ya Kombe la Ufaransa kati ya PSG na Bordeaux.

Tetesi zilizopo ni kwamba Moyes anawataka pia Davide Astori na Claudio Marchisio kwa ajili ya kukiboresha kikosi chake kabla ya kumaliza msimu.

Lakini, nchini Ufaransa kocha Laurent Blanc alimharibia Moyes kwa kuwaanzishia benchi baada ya mastaa wake, Ezequiel Lavezzi na Edinson Cavani na kumtegemea zaidi Pastore.

Ukiweka kando viungo na washambuliaji, Moyes anasaka pia mabeki ambapo kwenye kikosi cha PSG, Mbrazili Thiago Silva anatajwa kuwa kwenye orodha ya Mskochi huyo wa Old Trafford sambamba na Adrien Rabiot.

Phil Neville atumwa Hispania

Benchi la ufundi la Man United linaonekana kudhamiria kuondoa tatizo kwenye kikosi chao kwa kufanya usajili wa nguvu.

Gundogan Ilkay na huyu kutoka Dortmund

Wakati Moyes akiendelea Italia na Ufaransa kusaka majembe mapya, msaidizi wake, Phil Neville alitumwa Hispania kutazama wachezaji ambao watawajumuisha kikosini kabla ya msimu kumalizika.

Jumapili iliyopita, Neville alionekana uwanjani wakati Getafe ilipomenyana na Rayo Vallecano kwenye Ligi Kuu Hispania, La Liga. Kwenye mechi hiyo, Neville alikwenda kumtazama kinda mwenye kipaji cha maana, Saul Niguez anayecheza Rayo Vallecano kwa mkopo akitokea Atletico Madrid.

TOA MAONI YAKO HAPA CHINI