HIVI NDIVYO KARATA ILIVYO CHEZEKA KATI YA RONALDO,MESSIE NA RIBERY KUWANIA MPIRA WA DHAHABU (BALLON D'OR)

BALLON d’Or siku zote inatajwa kuwa ni vita inayochezwa nje ya uwanja kuwafanya wachezaji kutwaa tuzo binafsi za mafanikio ya vipaji vyaowanavyovionyesha ndani ya uwanja.

Kwa misimu kadhaa, ulimwengu wa soka uligubikwa na mjadala wa nani zaidi kati ya wanasoka wawili wanaotajwa kuwa na upinzani mkubwa kwenye kusaka umaarufu, Cristiano Ronaldo na Lionel Messi.

Kwa mwaka jana mjadala huo uliendelea na usiku wa Jumatatu iliyopita jibu lilipatikana, Ronaldo akatajwa kuwa zaidi ya Messi na kutwaa tuzo hiyo kwa kura 1,365 dhidi ya kura 1,205 za Messi.

Vita hiyo ilimhusisha pia Mfaransa Franck Ribery anayecheza Bayern Munich, ambaye aliambulia kura 1,127.

Asubuhi ya juzi Jumanne, Ronaldo alikwenda mazoezini Real Madrid na kusherehekea na wachezaji wenzake akiwa ameshika tuzo hiyo ambapo walipiga picha ya pamoja na kisha akaandika kwenye ukurasa wake wa Twitter: “Tuzo hii ni ya kila mtu. Kwa wote wafanyakazi na mabosi na mashabiki wote!”

Alipotajwa mshindi Jumatatu, Ronaldo alimwaga chozi kabla ya kufichua kwamba haikuwa rahisi kuinasa tuzo hiyo licha ya kwamba ilikuwa ni mara yake ya pili.

Lakini, imefichuka kwamba si Ronaldo wala Messi aliyempigia kura mwenzake kwenye kuwania tuzo hiyo. Wachezaji hao ambao ni manahodha wa nchi zao, hawakupigiana kura.

Kama inavyoelezwa, kutwaa Ballon d’Or ni vita inayochezwa nje ya uwanja, mashabiki na marafiki wa mastaa hao ndiyo waliofanya kazi kubwa katika kuhamasisha upigaji wa kura za kumpata mshindi.

Mfumo wa upigaji kura uliochukuliwa katika tovuti ya Shirikisho la Soka la Kimataifa (Fifa) unafichua kwamba chaguo la kwanza thamani yake ni alama tano, alama tatu kwa chaguo la pili na la tatu ni alama moja.

Messi, Ronaldo wachuniana

Messi amekubali na kukiri kwamba Ronaldo alistahili tuzo hiyo huku akidai alikuwa majeruhi muda mrefu na jambo hilo lilimfaidisha mpinzani wake.

Ukiacha Fifa kuwaweka karibu ukumbini ambapo siti zao zilitofautishwa na siti moja tu katikati, kushoto akiwa ameketi Ronaldo na mpenzi wake mrembo Irina Shayk na kulia akiwa Messi na mkewe Antonella Roccuzzo, wachezaji hao walikuwa kwenye presha kubwa kabla ya kufichuka kwamba walichuana kwenye kupigiana kura.

Kati yao, hakuna aliyemtambua mwenzake kwamba ni bora. Kwa mujibu wa kura hizo, Ronaldo hakuwa mchezaji bora wa Messi kwa mwaka 2013 sawa na ilivyokuwa kwa Mreno huyo ambaye hakumtambua staa huyo wa Argentina kama ni bora kwa mwaka huo.

Kura zilikuwa zikipigwa na manahodha, makocha waandishi maalumu ambao ni wajumbe wa Fifa. Kwa kuwa wawili hao wote ni manahodha kwenye nchi zao, Messi wa Argentina na Ronaldo wa Ureno, walikuwa na ruhusa ya kupiga kura, lakini hawakutakiwa kujichagua wenyewe.

Messi awachagua Barca wenzake

Kwenye kura hizo, Messi aliwapigia nyota wenzake wa Barcelona, Andres Iniesta akiwa chaguo lake la kwanza, kisha akawapigia Xavi na Mbrazili Neymar.

Kwa kura hizo, inaonyesha Messi alikoshwa na viwango vya nyota wenzake wa Barcelona kwa mwaka jana, huku akiwa hajaona mchezaji yeyote mwenye kiwango kikubwa kuliko wakali hao kutoka kwenye klabu nyingi ukimweka kando mpinzani wake, Ronaldo.

Falcao mchezaji bora wa Ronaldo

Kwenye kura hizo, Ronaldo alikuwa tofauti baada ya chaguo lake la kwanza kuwa straika wa Colombia na klabu ya Monaco, Radamel Falcao, wakati kwenye nafasi ya pili na tatu aliwapigia staa wa Wales, Gareth Bale na Mjerumani wa Arsenal, Mesut Ozil.

Kura za Ronaldo zinaonyesha kwamba hakuwa mbinafsi kwa maana ya kutazama wachezaji waliopo kwenye kikosi chake tu anachochezea kama alivyofanya Messi, licha ya kwamba Ozil aliwahi kucheza Real Madrid na Bale amejiunga na klabu hiyo ya Santiago Bernabeu msimu huu.

Kura zilivyopigwa

Messi lazima atahitaji maelezo kutoka kwa kocha wake wa timu ya taifa, Alejandro Sabella kwa nini alimpigia kura Ronaldo, wakati alipomchagua kwenye nafasi ya tatu nyuma ya Messi na Ribery.

Kwa bahati mbaya, Ribery alishika nafasi ya tatu, lakini akiwa amepata kura za kwanza kutoka kwa nahodha wake wa Ufaransa Hugo Lloris na kocha wake, Didier Deschamps.

Ufaransa walimtosa Messi, wakati mwenzake Ronaldo alipata kura kutoka kwa Deschamps aliyekuwa chaguo lake la pili.

Kocha wa Ureno, Paulo Bento alipiga kura kiufundi, akimchagua nyota wake, Ronaldo kwenye nafasi ya kwanza na kisha akawapa Falcao na Arjen Robben ambao wote hawakuwamo kwenye tatu bora, huku akimweka kando kabisa Messi.

England, kocha Roy Hodgson na nahodha wake, Steven Gerrard wote walimchagua kwenye nafasi ya kwanza, kabla ya kutofautiana kwa wachezaji wengine, wakati Hodgson aliwataja Zlatan Ibrahimovic na Robin van Persie, Gerrard aliwachagua Messi na nyota mwenzake wa Anfield, Luis Suarez.

Ibrahimovic, aliyetwaa tuzo ya Bao Bora la Mwaka alilofunga kwa ‘tick-tack’ dhidi ya England, alimpigia Ribery, Messi na Ronaldo licha ya kwamba staa huyo wa Sweden mara kadhaa aliripotiwa kuwa na bifu na supastaa wa Argentina, Messi, huku kwa Afrika, nahodha wa Cameroon, Samuel Eto’o na wa Ivory Coast, Didier Drogba walimpigia kura Yaya Toure.

Italia, Gianluigi Buffon na kocha wake, Cesare Prandelli walimchagua mtu wao, kiungo Andrea Pirlo kwenye nafasi ya kwanza.

Baadhi ya kura za manahodha zilivyopigwa na wachezaji waliowachagua kwenye mabano; Messi, Argentina (Iniesta, Xavi, Neymar), Thiago Silva, Brazil (Messi, Ibrahimovic, Ronaldo), Gerrard, England (Ronaldo, Messi, Suarez), Hugo Lloris, Ufaransa (Ribéry, Manuel Neuer, Bale), Philipp Lahm, Ujerumani (Ribéry, Ronaldo, Messi).

Gianluigi Buffon, Italia (Pirlo, Ronaldo, Messi), Robin van Persie, Uholanzi (Robben, Ibrahimovic, Ronaldo), Ronaldo, Ureno (Falcao, Bale, Ozil), Iker Casillas, Hispania (Ronaldo, Ribery, Robben), Ibrahimovic, Sweden (Ribery, Messi, Ronaldo).

Kura za makocha; Alejandro Sabella, Argentina (Messi, Ribery, Ronaldo), Luiz Felipe Scolari, Brazil (Ronaldo, Messi, Ibrahimovic), Roy Hodgson, England (Ronaldo, Ibrahimovic, Van Persie), Didier Deschamps, Ufaransa (Ribery, Ronaldo, Ibrahimovic), Cesare Prandelli, Italia (Pirlo, Philipp Lahm, Robert Lewandowski), Louis van Gaal, Uholanzi (Ribery, Thomas Muller, Robben).

Paulo Bento, Ureno (Ronaldo, Falcao, Robben), Vicente Del Bosque, Hispania (Xavi, Iniesta, Ribery), Erik Hamre, Sweden (Ibrahimovic, Messi, Ronaldo), Kim Poulsen, Tanzania (Messi, Ronaldo, Ribery). Kocha wa Ujerumani, Joachim Low kura zake hazikuonekana.

TOA MAONI YAKO HAPA CHINI