KAMA RONALDO ASINGEPEWA BALLON D'OR BASI NINGEKIMBIA MTUPU MITAANI:RIO FERDINAND

BEKI, Rio Ferdinand amesema angekimbia uchi mitaani kama staa wa Real Madrid, Cristiano Ronaldo asingetwaa tuzo ya kuwa Mwanasoka Bora wa Mwaka wa Dunia.

Nyota huyo wa Ureno, alikuwa akipewa nafasi kubwa ya kuibuka mshindi mbele ya wapinzani wake, Lionel Messi wa Barcelona na Franck Ribery wa Bayern Munich kabla ya kuwabwaga Jumatatu iliyopita kwa kutajwa mshindi na kunyakua tuzo yake ya pili ya Ballon d’Or.

Beki wa Manchester United, Ferdinand aliandika kwenye ukurasa wake wa Twitter kwamba angekimbia mtaani mtupu kama Ronaldo asingenyakua tuzo hiyo.

Ferdinand na Ronaldo wanatajwa kuwa ni marafiki wakubwa na hivi karibuni beki huyo Mwingereza alikuwa akimpigia simu kumtaka arudi Manchester United.

Kuthibitisha hilo, Ronaldo alisema: “Ni kweli Rio anazungumza sana na mimi. Ni rafiki yangu mkubwa, tulicheza pamoja Manchester United na tulikuwa majirani nilipokuwa Manchester. Ni mtu makini na hakika alikaribia kubadili mawazo yangu.

“Bado naiwaza Manchester United. Ipo moyoni mwangu, ni klabu niliyoichezea kwa miaka sita na naipenda sana. Nina marafiki wengi sana pale na hakika nawatakia kila lenye heri.”

TOA MAONI YAKO HAPA CHINI