HUYU NDO MCHEZAJI WA MANCHESTER UTD AMBAE INASEMEKANA UHUSIANO WAKE NA COACH WAKE HAUKO MZURI

UHUSIANO kati ya kocha wa Manchester United, David Moyes na winga wake chipukizi, Wilfried Zaha umetajwa kuwa katika hali mahututi na unaweza kufa muda wowote. Kuna mambo mengi yanaendelea nyuma ya pazia baina ya wawili hao.

Zaha amekuwa katika wakati mgumu Manchester United tangu aliposajiliwa na kocha aliyepita katika klabu hiyo, Sir Alex Ferguson kwa dili la Pauni 15 Milioni akitokea Crystal Palace Januari mwaka jana.

Hata hivyo, kitendo cha Ferguson kuamua kustaafu soka bila hata kufundishwa naye kulivunja mipango yote ya Man United dhidi yake kwa sababu kocha mpya aliyefuata hampi thamani hiyo.

Zaha azuiwa kuhama, afoka

Zaha amechukia vikali kuzuiwa kuhama Manchester United kwenda klabu ya Cardiff City kwa mkopo na Moyes na sasa anafikiria kuandika barua ya kuomba kuihama klabu hiyo.

Ilidaiwa kuwa Moyes alishakubaliana na kocha mpya wa Cardiff City, Ole Gunnar Solskjaer lakini akabadili mawazo ghafla kwa kile alichodai kuwa timu hiyo imeandamwa na majeruhi katika eneo la winga wa pembeni ambapo Luis Nani na Ashley Young wote ni majeruhi.

Alhamisi Zaha alipigiwa simu kufahamishwa kuhusu kukwama kwa dili lake la kwenda kucheza kwa mkopo Cardiff ambapo kulikuwa na majadiliano makali ya simu kati ya wawakilishi wake na Mkurugenzi Mtendaji wa Manchester United, Ed Woodward.

Hata hivyo Zaha mwenyewe alisikika akifoka na baadaye simu hiyo ilikatwa bila ya kuwepo mwafaka baina ya pande hizo mbili.

Wakati hali ikiwa hivyo tayari Moyes amemwambia Zaha kuwa uhamisho wake wa mkopo atauangalia tena mara baada ya pambano la marudiano dhidi ya Sunderland katika michuano ya Kombe la Ligi au Capital One.

Agoma kusafiri mechi ya Chelsea

Moyes anaamini kuwa benchi lake la ufundi lina hoja nzuri katika kumzuia Zaha kutolewa kwa mkopo, lakini Zaha amekerwa na kitendo hicho ambacho kinaikera nafsi yake hasa ukizingatia kwamba hata akibaki bado anasugua benchi.

Kutokana na kukerwa huko, inadaiwa Zaha aliamua kubaki nyumbani kwake katika Jiji la Manchester badala ya kwenda London kushuhudia pambano la timu yake dhidi ya Chelsea jana Jumapili katika uwanja wa Stamford Bridge.

Nyota huyo anayekipiga katika timu ya taifa ya England chini ya umri wa miaka 21, huku akilipwa na Man United mshahara wa Pauni 30,000 kwa wiki, bado hajaanza mechi hata moja chini ya Moyes huku akiwa ameachwa nyuma katika nafasi yake na Adnan Januzaj, Antonio Valencia, Nani, Young na Danny Welbeck.

Adai anaonewa na Moyes mazoezini

Inadaiwa kuwa Zaha anaamini Moyes anamwonea katika mazoezi ya timu hiyo yanayofanyika Uwanja wa Carrington jijini Manchester na tayari alishapokea barua ya kurasa nne kutoka kwa kocha huyo akimbwatukia.

Zaha anaamini kuwa Moyes amekuwa akimwandama kwa chuki binafsi mazoezini na katika tukio moja lisilo la kawaida alifokewa sana wakati alipopiga pasi iliyonaswa na maji yaliyokuwepo uwanjani.

Hata hivyo, sekunde chache baadaye kiungo Mjapani, Shinji Kagawa alifanya kosa hilo hilo lakini Moyes hakumfokea wala kuonyesha kukerwa.

Chini ya utawala wa Moyes, Zaha amecheza dakika 167 tu na nyingi kati ya hizo amecheza katika michuano ya Kombe la Ligi. Hata hivyo kocha wa timu ya taifa ya England chini ya miaka 21, Gareth Southgate ameendelea kumchagua katika kikosi hicho.

Kashfa ya mapenzi na mtoto wa Moyes

Zaha anaamini kuwa alitengwa mno wakati stori zilipoibuka mitandaoni kuwa alikuwa na uhusiano wa kimapenzi na mtoto wa Moyes aitwaye Lauren Moyes.

Alikerwa zaidi baada ya klabu hiyo kushindwa kutoa taarifa za kukanusha habari hiyo hali iliyomlazimu yeye mwenyewe akanushe katika mtandao wake wa Twitter.

Katika taarifa hiyo Zaha alisikika akisema: “Sijawahi kuwa na uhusiano wa mapenzi wala kukutana na binti wa David Moyes kwa hiyo nadhani hiyo si sababu ya mimi kutokucheza. Ningependa kuzuia uvumi huu wa uongo.”

Binti huyo wa Moyes alilazimika kuiondoa hewani akaunti yake ya Twitter katika tukio la Oktoba mwaka jana huku wengi wakiamini kuwa wameipata sababu halisi ya Moyes kumwacha nje katika kikosi cha kwanza Zaha.

TOA MAONI YAKO HAPA CHINI