MESSI,RONALDO NA RIBERY NANI AMBAE LEO ATANYAKUWA MPIRA WA DHAHABU?

BAADA ya vita vya maneno vya kipidi kirefu juu ya mchezaji gani haswa anastahili tuzo ya mchezaji bora duniani wa mwaka 2013 inayojulikana kama Ballon d’Or hatimaye kitendawili hicho kinaratajiwa kuteguliwa baadae leo katika sherehe za utoaji tuzo hiyo zitakazofanyika jijini Zurich, Switzerland. Nyota watatu walioteuliwa katika orodha ya mwisho ya kugombea tuzo hiyo ni nyota wa Ureno Cristiano Ronaldo anayecheza klabu ya Real Madrid, Muargentina Lionel Messi anayecheza Barcelona na Mfaransa Franck Ribery anayecheza Bayern Munich. Safari hii mpambano unaonekana kuwa mkali kati ya Ribery na Ronaldo ambao wamekuwa katika kiwango bora huku kila mmoja akiisaidia klabu na timu yake ya taifa kufikia mafanikio waliyopata mwaka jana. Messi ambaye anashikilia tuzo hiyo kwa miaka minne mfululizo anaonekana kutokuwa na nafasi ya kutosha kulinganisha na wenzake baada ya kuanza msimu vibaya kwa kuandamwa na majeruhi ya mara kwa mara ambayo yamepelekea kumuweka nje ya uwanja kwa karibu miezi miwili. Kila mtu amekuwa na maoni tofauti kuhusiana na wachezaji hao na viwango vyao walivyoonyesha mwaka jana lakini waamuzi wa mwisho watakuwa ni makocha na manahodha wa timu mbalimbali za taifa duniani ambao ndio waliokuwa wakipiga kura kuchagua mmoja wapo.

TOA MAONI YAKO HAPA CHINI