SOMA BARUWA AMBAYO MATA ALIYO WAANDIKIA MASHABIKI WAKE WA STAMFORD BRIDGE KAMA ISHARA YA KUWAAGA

KIUNGO Mhispaniola Juan Mata kwa sasa ni mchezaji wa Manchester United baada ya kukamilisha uhamisho wake wa Pauni 37.1 milioni akitokea Chelsea.

Staa huyo wa kimataifa wa Hispania ametua Old Trafford, lakini amekiri kwamba daima mashabiki wa Stamford Bridge watabaki kuwa na nafasi kubwa moyoni mwake. Katika kulithibitisha hilo, Mata aliwaandikia barua mashabiki wa Chelsea na kisha akaiweka kwenye tovuti yake ili kila mmoja apate fursa ya kuisoma. Mata alianza kwa kuwasalimia; Habari zenu. Kisha akaendelea kuwapasha mashabiki wa klabu hiyo kuhusu uamuzi wake wa kuhamia Man United.

Mata anaanza...

Kama mnavyotambua hii ni siku muhimu sana katika maisha yangu, kuhamia Man United. Ningependa mtambue hisia zangu kila ninavyoendelea kuandika barua hii.

Ninachokieleza kwenye barua hii kinatoka moyoni, kwanza ningependa kusema sitasahau mapenzi yenu kwangu tangu siku ya kwanza hadi ya mwisho.  Kwani mapenzi yenu yamenisaidia kupevuka kama mchezaji na kuwa mahiri ndani na nje ya uwanja. Siku zote nitakuwa na hisia za kipekee kwenu. Daima. Maneno hayajitoshelezi kuelezea vitu mlivyonipa.

Nimepita kwenye nyakati nzuri sana; kutwaa ubingwa wa Kombe la FA, taji langu la kwanza nilipofika Chelsea, pia nafurahi kuwa sehemu ya kihistoria kwa kuwamo kwenye kikosi kilichotwaa kwa mara ya kwanza taji la Ligi ya Mabingwa Ulaya na Kombe la Europa League.

Kwa upande mwingine, nimekumbana na mambo yenye utata mkubwa kwenye maisha binafsi hasa kwa miezi sita ya hivi karibuni. Lakini, kwa meseji zenu mlizonitumia kwenye mitandao ya kijamii, maneno mliyoniambia tulipokutana mitaani au kunisapoti pale nilipokuwa uwanjani hilo lilinifariji na kujivunia sana kuwa na mashabiki wa Chelsea.

Siwezi kusahau imani yenu juu yangu wakati nilipochaguliwa kuwa mchezaji bora wa Chelsea kwa misimu miwili mfululizo. Najivunia sana na daima sitasahau siku zile, asanteni sana. Natumai mnaelewa nyakati ngumu zilizonikabili kwa miezi michache ya hivi karibuni, nadhani nimefanya chaguo bora zaidi katika kuendeleza soka langu na kuufurahia mchezo huu.

Kabla ya kipindi cha usajili wa mwaka jana, dhamira yangu ilikuwa kubaki Chelsea kwa miaka mingi, kuendelea kutwaa mataji na klabu ya Chelsea. Hiyo ndiyo furaha niliyokuwa nayo hapo mwanzo kwenye klabu na jiji. Lakini, kama mnavyofahamu, kila kitu kilibadilika ghafla. Kutoka kwenye kujitambua mimi ni mchezaji muhimu kikosini hadi kukumbana na nyakati ngumu na kushindwa kuisaidia timu yangu kama ilivyokuwa awali.

Nilikaa kimya na kuheshimu hali halisi. Niliamini soka ni mchezo wa kitimu hivyo si rahisi kucheza kila mechi kwenye kikosi kizuri kama kile. Kwenye michezo unaweza kushinda au kushindwa, lakini jambo muhimu ni kujitolea kwa kila hali. Nadhani mnafahamu siku zote nilikuwa nafanya hilo. Kwenye kila mechi, kila mazoezi bila kujali, nilijitolea kwa kila hali kwa ajili ya klabu yangu.

Napenda kuwashukuru pia wachezaji wenzangu wa zamani kwa jinsi tulivyoishi tangu siku ya kwanza. Napenda kumshukuru nahodha kwa msaada wake katika kuniweka sawa kwa sababu aliguswa na kila kilichokuwa kikiendelea.

TOA MAONI YAKO HAPA CHINI