SOMA HISTORIA YA SIKU KAMA YA LEO MYAKA KADHAA ILIYO PITA

Siku kama ya leo miaka 35 iliyopita kulitokea mapigano makali baina ya askari wa utawala wa Shah wa Iran na wananchi baada ya maandamano ya mara kwa mara ya wananchi wa Iran dhidi ya utawala wa kidikteta hapa nchini. Wakati huo baadhi ya wanajeshi wa Shah ambao walielewa haki ya mapambano ya taifa la Iran walikimbia kambi zao za kijeshi na kujiunga na wananchi. Hatua hiyo ilikuwa bishara njema ya mageuzi ya kimsingi katika muundo wa jeshi la Shah. Wakati huo kiongozi wa harakati za mapinduzi Imam Ruhullah Khomeini alitoa ujumbe akihamasisha jeshi kujiunga na mapambano ya wananchi dhidi ya utawala wa kidikteta wa Shah na kutetea Uislamu na sheria zake.

Tarehe 15 Januari miaka 175 iliyopita, nchi ya El Salvador ilijitangazia rasmi uhuru baada ya kusambaratika Muungano wa Amerika ya Kati. Hata hivyo nchi hiyo haikupata amani na utulivu hata baada ya kupita karne moja. El Salvador ambayo ilikuwa ikikoloniwa na Uhispania kwa miaka kadhaa, ilijipatia uhuru mwaka 1821, na ulipofika mwaka 1824 ilijiunga na Muungano wa Amerika ya Kati, na hatimaye uliposambaratika muungano huo, nchi hiyo ilijitegemea kikamilifu.

Na siku kama ya leo miaka 1145 alizaliwa Qadhi Jorjani maarufu kwa lakabu ya Abulhassan, faqihi, mwandishi na malenga wa Kiislamu. Jorjani alifunzwa masomo hayo ya kidini na Qadhi Mkuu wa mji wa Rei ulioko karibu na Tehran ya leo. Qadhi ameandika vitabu vingi vya kielimu na miongoni mwake ni vile vya "Tafsirul Qur'an" na "Tahdhib al Tarikh". Qadhi Jorjani alifariki dunia mwaka 366 Hijria huko Neishabur na akazikwa huko Jorjan au Gorgan ya leo kaskazini mashariki mwa Iran.

TOA MAONI YAKO HAPA CHINI