UHAMISHO WA NEYMAR KWENYE CLUB YA BARCELONA WALETA UTATA,HADI KUFIKIA RAIS WA CLUB HIYO KUACHIA NGAZI

RAIS wa Barcelona, Sandro Rosell ameachia ngazi na kuwalaumu wale wote wanaomshambulia kutokana na kashfa ya pesa katika uhamisho wa staa wa timu hiyo, Neymar kutoka klabu yake ya zamani, Santos.

Rosell na Barcelona kwa sasa wanachunguzwa na Mahakama Kuu Hispania kutokana na kashfa ya hesabu mbovu za pesa katika uhamisho huo wa Neymar uliofanyika kipindi cha majira ya joto.

Mabingwa hao wa Hispania walimnunua Neymar kwa kiasi cha Euro 57 milioni Mei mwaka jana, lakini inasemekana ni kiasi cha Euro 17 milioni tu ndizo zilizoingia katika akaunti ya Santos.

“Mimi na familia yangu kwa muda mrefu sasa tumeumia na mashambulizi haya ambayo yamenifanya nijiulize kama ina maana yoyote kuwa rais. Katika siku za karibuni kumekuwa na shutuma zisizo na maana kwangu kutoka mahakamani. Nasisitiza kwamba kila kitu kilikwenda sawa katika uhamisho wa Neymar,” alisema Rosell.

Majaji nchini Hispania wamekubali kuanza kusikiliza kesi ya uhamisho wa staa huyo baada ya kugundulika kuwa wa kiujanjaujanja.

TOA MAONI YAKO HAPA CHINI