UJIO WA MCHEZAJI MATA OLD TRAFFORD AKITOKEA CHELSEA KIDONDA KWA COACH ARSENE WENGER

UJIO wa Juan Mata katika klabu cha Manchester United umeleta utata mkali mno hasa kutoka kwa kocha wa Arsenal, ‘Profesa’ Arsene Wenger ambaye kwa hakika amechukizwa na biashara ambayo Man United ilifanya na Chelsea.

Mata nikimchambua kwa undani kiasi namkumbuka kuwa ni kiungo hatari mno. Ni mchezaji ambaye amekuwa ndani ya kikosi cha timu ya taifa ya Hispania kwa muda mrefu tangu mwaka 2009.

Katika soka duniani kote, Mata ni kati ya viungo hatari, Chelsea kwa misimu miwili Mata alikuwepo pale Stamford Bridge aliweza kupiga pasi za uhakika na kufunga mabao 18.

Alikuwa mchezaji bora wa Chelsea kwa misimu miwili mtawalia. Duniani kiungo kupiga mabao18 si jambo dogo, inadhihirisha uwezo alionao si tu katika kutengeneza pasi za kuzalisha mabao bali hata kufunga inapobidi.

Kuna baadhi ya washambuliaji katika hizi klabu za juu ambao hata kufikisha mabao 10 pekeee kwa msimu mmoja inakuwa shida kubwa.

Tukirejea suala la Wenger kulalamikia biashara ya Chelsea na Man United, swali langu ni hili hapa. Je Jose Mourinho na Chelsea yake wangekuwa hawajacheza na Man United mzunguko wa pili wangemuuza Mata?

Jibu langu ni la. Sijui wewe lakini Mourinho amekuwa na mbinu chafu na anatafuta njia zozote za kulitwaa taji. Anaihami Man United. Kumbuka Man United bado hawajakabiliana na Man City, Liverpool na Arsenal.

Wenger anamfahamu Mata vilivyo hata akafikia hatua ya kumtaka Emirates, matumaini ya Wenger msimu huu ni kuhakikisha analibeba taji la Ligi Kuu England (EPL) ni matumaini ambayo yapo juu mno.

Kutokana na mpango wake huo ndiyo maana anaziona mbinu chafu zinazofanywa na Jose Mourinho za kumsimamisha katika mbio za kulitwaa taji la EPL.

Mbinu za Jose Mourinho za kushinda mechi ni chafu, kuanzia kwa kejeli na mambo mengine. Itakumbukwa Mourinho na Chelsea yake walikuwa wameshaapa kwamba hawatomuuza Mata kwa Man United. Na hapa ndipo unapojiuliza kulikoni kubadilika na mwisho wa siku kuamua kuwauzia Man United mchezaji huyo?

Mata ni mchezaji hodari mno. Hadi sasa mechi mbili ambazo amecheza ametoa pasi mbili za uhakika za mwisho. Ni kiungo ambaye yupo kila mahali katika eneo husika pia ana chenga za maudhi.

Mourinho amepiga hesabu kuwa akiihami Man United na silaha hatari kama Mata ataweza kupunguza makali ya Man City na Arsenal. Man United haipo katika mbio za kuwania ubingwa msimu huu lakini inaweza na ina kila sababu za kutoa upinzani kwa Man City na Arsenal na Mata na ushupavu wake anaweza kuwa sababu ya kutoa mwelekeo wa mechi yoyote ile.

Kumbuka inahitaji ujasiri wa mchezaji mmoja tu kubadilisha timu yoyote ile. Kumbuka ujio wa Robin Van Persie katika klabu ya Man United, msimu mmoja tu ulibadilisha ligi na Man United waliweza kulitwaa taji.

Kwa wakati huu kiungo Mesut Ozil wa Arsenal ndiye tegemeo kubwa katika klabu hiyo na ujio wake pale Emirates umebadili mengi mno, pasi anazopiga za uhakika na za ukweli zinaifanya Arsenal kuwa juu ya jedwali.

Anavyowatafuta washambuliaji ndugu zangu acha tuu. Hadi natamani kurejea uwanjani. Arsenal kuwa kileleni ni juu ya mchezaji mmoja tu, naye ni Ozil, angalia wakati Ozil hayupo uwanjani, inakuwa ni wakati mgumu kwa Wenger na kikosi chake kuweza kuzikabili timu pinzani.

Kwa hivyo Wenger akiteta kuhusu mauzo ya Mata kwenda Man United inaeleweka, ana hoja ya msingi katika jambo hilo, hapaswi kubezwa.

Mourinho mara nyingi ni aina ya kocha ambaye mbinu zake ni chafu na za kihuni. Kumbuka anavyocheza mechi zake na timu kubwa, atawapanga walinzi zaidi ya saba uwanjani. Na mshambuliaji mmoja tu.

Kuna wakati mmoja akicheza na Barcelona, kwa sababu anajua Barca ni timu ya kupiga pasi za haraka haraka alichofanya ni kama kuharibu uwanja ambao uligeuka mfano wa uwanja wa farasi au ng’ombe ambao walikuwa katika mbio za kuelekea malishoni na mwisho wa siku Barca walilemewa kucheza soka pale.

Kwa hivyo mbinu za Jose Mourinho za kulitwaa taji la msimu huu mojawapo ni kuihami Man United, hata kuipa silaha za kuingamiza Man City na Arsenal.

Hata hivyo haitakuwa rahisi, Mourinho hatofanikiwa katika mbinu zake hizo kwani Man City na makali yao ndugu zanguni itakuwa kazi kubwa kuwasimamisha. Wakati Arsenal wakienda sare ya mabao 2-2 na Southampton, Man City waliiadhibu vikali Tottenham Hotspurs kwa mabao 5-1, tena nyumbani kwao White Heart lane.

Nayo Chelsea ikapoteza mwelekeo walipoenda sare ya kutofungana na West Ham Utd nyumbani kwao Stamford Bridge.

Kocha wa Man City, Manuel Pellegrini hana tatizo, karata zake anazicheza polepole, ameapa kutwa mataji yote manne msimu huu. Capital One, FA, EPL pamoja na taji la Ligi ya Mabingwa Ulaya.

Hadi sasa EPL inazidi kunoga. Je ni Man City, Arsenal, Chelsea au Liverpool watalitwaa taji la msimu huu?

Bado zaidi ya mechi 15 kwa kila klabu kucheza. Hizo ni pointi 45. Ukweli atakayeteleza kwa sasa, Watetezi wa ligi hiyo Man United washatolewa. Kupoteza mechi dhidi ya Stock City Jumamosi iliyopita ilikuwa dhahiri kwao kwamba ligi ya msimu huu si yao, na hata kumaliza nne bora itakuwa ni ishu kubwa.

TOA MAONI YAKO HAPA CHINI