MAJESHI YA ETHIOPIA YAOMBWA KUSALIA SOMALIA

Sheikh Ahmad Madobe, Rais wa eneo lililojitangazia mamlaka ya ndani la Jubaland lililoko kusini mwa Somalia, ameyataka majeshi ya Ethiopia yaendelee kubaki nchini humo. Mwaka uliopita, serikali ya Somalia iliafiki kulipatia eneo la Jubaland mamlaka ya ndani, lakini hadi hivi sasa bado haijatoa ruhusa hiyo kwa eneo la Somaliland. Majeshi ya Ethiopia yakishirikiana na majeshi ya serikali ya Somalia na vikosi vya kulinda amani vya  Umoja wa Afrika AMISOM, yanatekeleza operesheni za pamoja dhidi ya kundi la al Shabaab kwa lengo la kulitokomeza kikamilifu kundi hilo la kigaidi. Kabla ya hapo, serikali ya Ethiopia ilisisitiza kuendelea kuyabakisha majeshi yake nchini Somalia. Viongozi wa Ethiopia wamesisitiza kuendeleza mapambano dhidi ya al Shabaab, na hasa kutokana na hofu ya kusambaa mashambulizi ya kundi hilo kwenye mipaka ya pamoja ya nchi hizo mbili. Wachambuzi wa mambo wanaeleza kuwa, wasiwasi  wa  serikali ya Ethiopia ni wa kimantiki, kwani mpaka wa pamoja na nchi hizo mbili unakaribia urefu wa kilomita 1,600. Imeelezwa kuwa, sababu ya majeshi ya Kenya nayo kuingia ndani ya ardhi ya Somalia mwezi Oktoba 2011, ilitokana na hatari ya kiusalama iliyokuwepo nchini humo. Kuongezeka harakati za kundi la al Shabab nje ya mipaka ya Somalia, kumetishia mno usalama wa nchi za eneo la Mashariki mwa Afrika. Licha ya hayo, mashambulio ya kundi hilo yamesababisha kupungua safari za watalii wa kigeni nchini Kenya, ambapo uchumi na maisha ya wananchi wa nchi hiyo yanategemea zaidi  pato la sekta ya utalii. Kabla ya hapo, viongozi wa nchi wanachama wa Jumuiya ya Kieneo ya IGAD walichukua maamuzi ya kukomesha machafuko nchini Somalia, kwa kuimarisha mashirikiano yao na serikali ya Mogadishu, sanjari na kupelekewa nchini Somalia wanajeshi wa Ethiopia mwezi Novemba mwaka 2011.  Hatua ya viongozi wa IGAD ya kubariki kuingia majeshi ya Kenya na Ethiopia nchini Somalia, imeandaa mazingira ya kushirikishwa nchi hizo mbili kwenye operesheni za vikosi vya AMISOM. Umoja wa Afrika ambao ndio unaoongoza vikosi vya kulinda amani nchini Somalia, unatarajia kupitisha rasmi mpango wa kushirikishwa majeshi ya Kenya kwenye operesheni za AMISOM mwezi Januari mwakani. Mwaka uliopita, majeshi ya Ethiopia yaliunganishwa rasmi kwenye vikosi vya Umoja wa Afrika vya kulinda amani nchini Somalia. Kundi la al Shabaab lilitoa radiamali na kufanya shambulio katika jengo la maduka ya biashara Westgate jijini Nairobi mwaka jana, na kutishia usalama wa nchi zote zinazopanga mikakati ya kulitokomeza kundi hilo. Bila shaka, mwaka jana wanamgambo wa al Shabaab walishindwa vibaya kwenye medani za mapigano na majeshi ya serikali ya Somalia, Ethiopia na Kenya na hatimaye kupoteza udhibiti wa maeneo mengi waliyokuwa wakiyadhibiti. Alaa kullihaal, wiki mbili zilizopita, Msemaji wa al Shabaab alisema kwamba viongozi wa kundi hilo wameazimia kuyateka tena maeneo yote waliyokuwa wakiyadhibiti mwaka 2013. Kwa mtazamo wa kundi la al Shabaab, ardhi yote ya Somalia inafungamana na kundi hilo, na serikali ya Somalia ambayo inaungwa mkono na Umoja wa Mataifa na jamii ya kimataifa ni vamizi tu na majeshi yote yanapaswa kuondoka nchini humo. Shambulio la hivi karibuni la kundi hilo dhidi ya Ikulu ya Rais na mlipuko wa bomu uliotokea uwanja wa ndege wa Mogadishu, yalifanyika kwa sababu hizohizo. Inaonekana kuwa, takwa la Sheikh Ahmad Madobe kiongozi wa eneo lenye mamlaka ya ndani la Jubaland la kubakishwa majeshi ya Ethiopia nchini Somalia, linatokana na woga wa kufanyika mashambulio mapya ya kundi la al Shabaab kwenye maeneo liliyokuwa likiyadhibiti na ambayo sasa yanadhibitiwa na vikosi vya AMISOM. Inafaa kuashiria hapa kuwa, sisitizo la Abdiweli Sheikh Ahmed Waziri Mkuu wa Somalia la kutokomezwa kundi la al Shabaab hadi ifikapo mwishoni mwa mwaka 2014, limelikasirisha kundi hilo na ndio maana limeamua kuendeleza mashambulio dhidi ya majeshi ya serikali na waitifaki wake. Hii ni katika hali ambayo, wananchi na serikali zinazoiunga mkono Somalia, zinaunga mkono utekelezwaji wa operesheni za kulitokomeza kundi hilo ambazo zitasaidia kurejeshwa amani na utulivu kwenye nchi zao na eneo lote la Mashariki na Pembe ya Afrika.

TOA MAONI YAKO HAPA CHINI