ATHARI ZA BAADA YA KUONEKANA KUWA TIMU MANCHESTER UNITED IMESHUKA KIWANGO

Ligi Kuu ya soka ya nchini England inaelekea ukingoni na  ndoto za mabingwa watetezi, Manchester United za kuendelea kubaki na kombe hilo zimepeperuka baada ya kushuhudia vipigo vingi, hasa nyumbani kwao, Old Trafford.

Huu ni uwanja ambao katika miaka mingi ya kocha Sir Alex Ferguson ilikuwa ngome inayoogopwa na wachezaji na makocha wa timu pinzani, lakini tangu msimu huu umeanza wakiwa chini ya David Moyes, mambo yamegeuka.

Man United imekuwa timu ya kubezwa, ambayo imefungwa na timu nyingi ndogo, baadhi ikiwa ni mara ya kwanza katika historia zao kuwafunga Mashetani Wekundu, mfano Swansea.

Rekodi nyingi zimewekwa na kuvunjwa, lakini kwa upande hasi kwa United ambao sasa wanajaribu kujitutumua ili walau wacheze Ligi ya Europa japokuwa vigingi mbele yao bado ni vingi kwa jinsi timu nyingine zinavyowawekea kauzibe.

Athari za matokeo hayo kisaikolojia zinamuumiza zaidi kocha ambaye aliona ni heshima kubwa sana kupata nafasi ya kuwafundisha mabingwa hao na moja ya klabu zinazoheshimika zaidi duniani.

Lakini matokeo haya naathiri pia chapa ya Ligi Kuu ya England (EPL) machoni pa ulimwengu wa michezo, kwa sababu kimsingi kutetereka huko kunashusha kwa namna fulani hadhi ya ligi yenyewe.

Hii ni kwa sababu  za anguko la Manchester United haziishii ndani tu, bali pia nje ya nchi, kwa sababu kwa mfano kwenye Ligi ya Mabingwa Ulaya (UCL) licha ya kufika hatua ya robo fainali, ilikuwa bahati zaidi kuliko uwezo.

Tunakumbuka bado jinsi Olympiakos walivyowaadhiri kwenye mchezo wa kwanza na kuwafunga 2-0, timu ambayo ni ndogo ikilinganishwa na United.

Lakini pia mchezo dhidi ya Bayern Munich ambapo United walilazimisha sare, ‘waliegesha basi’ ndiyo maana winga wa Wajerumani hao, Arjen Robben akasema ilikuwa kana kwamba United wanajihami kwenye mpira wa mikono.

Mtaalamu wa masuala ya soka na biashara kuhusiana na chapa na matangazo, Evans Brighton anasema kwamba hii ni sawa na panga lenye kukata kuwili kwa sababu klabu kubwa kama hii inapoanza kufanya mambo ya  ovyo, inapunguza washabiki kwenye ligi husika na kidogokidogo mapato.

Hii ni timu iliyopata kutwaa ubingwa wa England mara 20, ikawa na kocha aliyesifika kote duniani na kuna watu waliokuwa wakiweka fedha zao kwenye ligi hii kwa sababu ya timu, kocha wake, aina ya wachezaji waliopo au hata wamiliki kwa maana ya uhakika wa kufanya vyema.

Lakini moja ya klabu kubwa kama hii inapodondoka tafsiri yake kimataifa ni kwamba na utamu wa ligi unaweza pia kuwa na tatizo, watu wakaamua kuelekeza macho yao kwenye ligi nyingine.

Ikumbukwe kwamba Ligi Kuu England ndiyo sasa maarufu zaidi kote duniani, lakini kadiri miaka inavyokwenda watu wanakuja na hoja kinzani, wakianza kutupia macho Bundesliga (Ligi Kuu Ujerumani), La Liga (Ligi Kuu Hispania) na hata Ligue 1 (Ligi Kuu Ufaransa).

Katika viwango vya klabu 20 bora duniani vilivyotolewa hivi karibuni na wataalamu wanaochambua masuala ya soka, Manchester United imetupwa nje. Walau kubaki kwa Chelsea kwenye timu nne zilizoingia nusu fainali ya Ligi ya Mabingwa Ulaya kunaweza kuisaidia nchi hii, lakini nao pia walipita kana kwamba kwa bahati, kwenye timu ambayo kocha anawabeza washambuliaji wake kila uchao.

Kwa hiyo unahitajika uwiano fulani kuhakikisha kwamba timu zina nguvu, zinashindana kweli kweli na si kushiriki tu. Kuanzia mwaka jana hadi 2016, kwa dili lililoingiwa na Bodi ya Ligi Kuu na wadau, vituo vya televisheni vya ng’ambo viliingizia EPL kitita cha Pauni 3 bilioni kwa mwaka jana tu.

Hiki ni kiasi kikubwa cha fedha na wakati dili linasukwa na vituo hivyo kwa ajili ya kudaka na kurusha matangazo ya Sky na BT Manchester United ndio walikuwa mabingwa, lakini sasa upepo umebadilika.

Man U hawatakuwa tena kwenye Ligi ya Mabingwa Ulaya, watatakiwa kusubiri labda hadi Septemba 2015, kama watakuwa wamejijenga ili kuingia humo tena.

Ni kitu ambacho washabiki wa United hawakuwa wamezoea, kwani kila mwaka, tangu miaka 19 iliyopita, wengi wao walikuwa na uhakika wa kama si ubingwa basi nafasi ya pili au ya tatu na hivyo ndivyo timu inasuka mashabiki na ligi kupendwa hivyo pesa kumwagwa kutoka kila kona ya dunia.

Athari nyingine za hali hii, japokuwa Kocha Moyes anapinga, ni kukosa saini za wachezaji muhimu. Ni wazi kwamba United wanatakiwa kupangua vijeba wengi waliomo pamoja na wachezaji wasioonesha ama uwezo au kujituma.

Licha ya kuwa nilishaandika mara nyingi juu ya ajabu ya mabadiliko haya wakati wachezaji ni walewale waliotwaa ubingwa msimu uliopita, ni wazi baadhi watajiondoa wenyewe, wengine wapelekwe kwa mkopo kwingine na baadhi kuuzwa kabisa.

Inaelezwa kwamba mamilioni yametengwa kwa ajili ya usajili wa haja na kwamba washabiki hawatakiwi kuwa na wasiwasi kwa vile matatizo haya ni ya msimu huu tu. Lakini lazima waelewe kwamba wachezaji nyota wanapenda timu iliyo kwenye Ligi ya Mabingwa Ulaya na United hawamo humo.

Ni wakati huu mahasimu wakubwa wa kitaifa wa United, Liverpool wanafanya vizuri pia msimu uliopita United walimaliza ligi wakiwazidi The Reds kwa pointi 38! Msimu huu wapo nyuma yao kwa pointi 17!

Pia watani wa jadi katika Jiji la Manchester, yaani Manchester City nao wanang’ara sana. Washabiki wa Mashetani Wekundu wanajiuliza; maisha bila Ligi ya Mabingwa Ulaya yatakuwaje?

Wengine wanahoji iwapo ndio mwanzo wa kuanguka kwa ufalme wa Old Trafford au ni kuteleza tu.

Kazi kubwa iliyo mbele ya Moyes, ambaye inaelekea Makamu Mwneyekiti,  Edward Woodward na wamiliki Familia ya Glazer bado wana imani na Moyes na watampa kitita ili atafute wachezaji. Msimu uliopita alipewa fedha nyingi lakini alifanikiwa kumnasa mchezaji mmoja tu tena siku ya mwisho, naye ni mchezaji wake wa zamani pale Everton, Marouane Fellaini ambaye hajawasaidia sana United zaidi ya kupewa kadi za njano na nyekundu na wakati mwingine kuhurumiwa na waamuzi tu kutokana na mchezo wake wa rafu.

TOA MAONI YAKO HAPA CHINI