RAIS OBAMA ATANGAZA KUSALIYA MAJESHI YAKE ELFU 10 HUKO AFGHANISTAN

Rais Barack Obama wa Marekani ametangaza kile alichosema ni ramani ya njia ya kuondoka majeshi ya nchi yake huko Afghanistan. Kwa mujibu wa mpango huo, Marekani itabakisha takriban wanajeshi 10 000 nchini Afghanistan badala ya kuondoa kikosi chote kufikia mwishoni mwa mwaka huu kama ilivyokuwa imepangwa na kukubaliwa huko nyuma.

Kiongozi huyo amesema wanajeshi hao watakuwa na jukumu la kutoa mafunzo zaidi kwa wanajeshi wa Afghanistan na kwamba shughuli zao zitajikita zaidi katika mji mkuu, Kabul na katika kituo cha kijeshi cha Bagram.

Hata hivyo, yote hayo yatategemea iwapo rais atakayechaguliwa Afghanistan atakubali kusaini makubaliano ya aina hiyo. Wachambuzi wengi wanaamini kwamba, rais mpya ajaye nchini Afghanistan yumkini akakubali kusaini makubaliano ya kuruhusu Washington kubakisha maelfu ya wanajeshi katika nchi hiyo.

TOA MAONI YAKO HAPA CHINI