SYRIA YAUKOSOWA MSIMAMO WA UMOJA WA MATAIFA KUHUSU WAASI NCHINI HUMO.

Syria imelikosoa Baraza la Usalama la Umoja wa Mataifa kwa kudharau tahadhari za mara kwa mara kwamba magaidi wanaoungwa mkono na madola ya kigeni wana silaha za mauaji ya umati. Bashar al Jaafari mwakilishi wa Syria katika Umoja wa Mataifa amesema, Damascus imewatahadharisha maafisa wa umoja huo kwa kuwaandikia barua zaidi ya 100 kuhusu hatari hiyo.  Pia amezikosoa baadhi ya nchi wanachama wa Baraza la Usalama kwa kuyasaidia makundi ya kigaidi nchini Syria kupata silaha za mauaji ya umati .

Wakati huo huo kiongozi wa kundi kubwa zaidi la wapinzani wa Syria wanaoungwa mkono na nchi za kigeni ameitaka Marekani iwapatie silaha zaidi kwa ajili ya kupigana na serikali ya Damascus. Ahmad Jurba mkuu wa muungano unaojiita Syrian National Coalition (SNC) alitoa ombi hilo nchini Marekani na kudai kuwa, wapiganaji wake wanahitajia silaha bora zaidi ili waweze kubadilisha mlingano wa nguvu nchini Syria.

TOA MAONI YAKO HAPA CHINI