JUMUIYA YA USHIRIKIANO WA KIISLAM (O.I.C) IMELAANI VITENDO VYA KUNDI LA BOKO HARAM

Katibu Mkuu wa Jumuiya ya Ushirikiano wa Nchi za Kiislamu OIC amewataja  wanamgambo wa kundi la Boko Haram linalopambana na serikali ya Nigeria kuwa watenda jinai. Iyad Ameen Madani ameyasema hayo baada ya kukutana na kufanya mazungumzo na Bashiru Aminou Wali  Waziri wa Mambo ya Nchi za Nje wa Nigeria mjini Jeddah na kusema kuwa, hatua ya kundi la Boko Haram ya kuwauwa na kuwateka nyara watu wasio na hatia inakinzana na misingi ya dini ya Kiislamu. Madani amesisitiza kwamba, OIC inatangaza mshikamano wake na wananchi na serikali ya Nigeria kwenye mapambano dhidi ya kundi la Boko Haram. Katibu Mkuu wa OIC amesema kuwa, dini ya Kiislamu hairuhusu kwa namna yoyote ile kuua watu wasio na hatia au kuwateka nyara watoto. Serikali ya Nigeria imekuwa ikilituhumu kundi la Boko Haram kwa kuua na kujeruhi maelfu ya watu katika kipindi cha miaka michache iliyopita. Hapo jana, Umoja wa Ulaya uliliweka kundi la Boko Haram kwenye orodha ya makundi ya kigaidi na pia kuliwekwa vikwazo.

TOA MAONI YAKO HAPA CHINI