SERIKALI YA KUWAIT YAKABWA KOO NA MAELFU YA WAFUASI WA UPINZANI KISA UFISADI.

Maelfu ya wafuasi wa upinzani wanaopinga serikali wameandamana nchini Kuwait, kutaka kuhitimishwa ufisadi wa mamilioni ya dola unaodaiwa kufanywa na maafisa wa serikali. Maadamano hayo yamefanyika kufuatia wito uliotolewa na kiongozi mkuu wa upinzani Musallam al Barrak ambaye ametishia kutaja majina ya maafisa wanaohusika katika ulaji rushwa. Akihutubia maandamano hayo Al Barrak ambaye ni mbunge wa zamani amesema, ufisadi na ulaji rushwa vimeenea katika taasisi zote za nchi, na kwamba wananchi wanaojitokeza kuhoji suala hilo wanahongwa mamilioni ya dinar. Kiongozi huyo wa upinzani wa Kuwait amesema kuwa, wamechoshwa na tatizo hilo na sasa wakati umewadia wa kupambana na ufisadi.

Hayo yanajiri huku utawala wa Kuwait ukijaribu kujitanzua na kutapakaa sauti za mazungumzo yanayodhihirisha kuwa maafisa wa zamani wa serikali wanapanga njama dhidi ya utawala wa Kuwait City na Amir wa nchi hiyo Sheikh Sabah al Ahmed al Sabah. Kadhia hiyo imezusha mjadala mkubwa nchini humo ambapo serikali imeamuru kufungiwa vyombo vya habari huku kesi hiyo ikiupa fursa upinzani kwa mara nyingine kupaza sauti baada ya kutulia kwa karibu mwaka mmoja.

TOA MAONI YAKO HAPA CHINI