SOMA HIZI HISTORIA ZINAZO AMBATANA NA SIKU KAMA YA LEO YA JUNI 3

Siku kama ya leo miaka 1397 iliyopita mwafaka na tarehe 5 Shaaban mwaka 38 Hijria Ali bin al Hussein, mmoja wa wajukuu wa Mtume Mtukufu wa Uislamu SAW alizaliwa katika mji mtakatifu wa Madina. Kwa uwezo wa Mwenyezi Mungu na kutokana na kuwa pamoja na baba yake yaani Imam Hussein AS mjukuu wa Mtume Muhammad SAW, mtukufu huyo alipata mafunzo mema ya kimaanawi na kiaklaqi na kunufaika na mafunzo ya bahari kubwa ya elimu ya baba yake. Mtukufu Ali bin al Hussein AS alisifika kwa takwa na kumcha Mwenyezi Mungu kwani alikuwa akikesha usiku kwa ajili ya ibada. Alipewa lakabu ya Sajjad yaani mtu anayesujudu sana kutokana na sijda zake za muda mrefu alizokuwa akizifanya kwa ajili ya kutaka radhi za Mwenyezi Mungu SW. Katika tukio la Ashura ambapo baba yake mtukufu, Imam Hussein AS na idadi kubwa ya wajukuu wa Mtume SAW waliuawa shahidi, Hadhrat Sajjad AS hakuweza kushiriki katika Jihad kutokana na ugonjwa mkali. Baada ya Hamasa ya Karbala, Hadhrat Sajjad akiwa na shangazi yake yaani Bibi Zainab SA walianza kufichua vitendo vya kidhulma vya Bani Umayya sambamba na kuarifisha Ahlul Bayt kwa umma. Alichukua uongozi wa Waislamu tokea wakati huo hadi mwisho wa umri wake uliojaa baraka yaani mwaka 94 Hijria.

 -------------------------------------------------------------------

Miaka 512 iliyopita siku kama ya leo, Vasco da Gama baharia wa Kireno alifanya mauaji ya umati huko Calicut, mji ambao hivi sasa imepewa jina la Kozhikode, ni bandari iliyoko huko Madras kusini mwa India. Bandari hiyo ilikuwa eneo la kwanza alipofikia baharia Vasco da Gama mwaka 1498 Miladia na baadaye kulikalia kwa mabavu eneo hilo. Vasco da Gama kama walivyo wakoloni wengine, alidai kuwa mmiliki halisi wa India. Vasco da Gama alitoa amri ya kukatwa, masikio na pua za mabaharia wa Kiarabu wakati walipowasili katika bandari ya Calicut kwa jili ya kufanya biashara ya mchele. Pia aliwauwa kwa umati wafanyabiashara hao wa Kiarabu baada ya kuzichoma moto meli zao.

--------------------------------------------------------------------

Siku kama ya leo miaka 51 iliyopita, Imam Khomeini (M.A), mwasisi wa Jamhuri ya Kiislamu ya Iran alitoa hotuba kali ya kihistoria dhidi ya utawala wa kitwaguti wa Iran, kwa mnasaba wa Ashura ya Imam Husseini (A.S). Imam Khomeini alitoa hotuba hiyo mbele ya hadhara kubwa ya wananchi na wanazuoni katika Madrasa ya Faidhiya katika mji mtakatifu wa Qum nchini Iran, licha ya vizuizi na vitisho vya utawala wa Shah. Imam alikosoa vikali usaliti wa utawala wa Shah na vibaraka wake na kukosoa hiyana ya utawala huo dhidi ya wananchi Waislamu wa Iran. Sehemu ya hotuba ya Imam Khomeini ilisema hivi kama ninavyomnukuu: "Watu hao wanapinga Uislamu na wanazuoni na wana nia ya kuutokomeza. Enyi wananchi, dini yetu ya Kiislamu na nchi yetu viko hatarini na tuna wasiwasi mkubwa kuhusu hali ya Iran," mwisho wa kunukuu.

TOA MAONI YAKO HAPA CHINI