Polisi watawanya wachuuzi waliotaka kwenda Afisi ya Rais

Gavana wa Nairobi Dkt Evans Kidero.

POLISI walilazimika kutumia vitoa machozi kuwatawanya wachuuzi waliokuwa wakiandamana Nairobi Jumatatu wakidai kuwa wamekuwa wakihangaishwa na maafisa hao, ikiwa ni pamoja na kuuawa kwa baadhi yao.

Wachuuzi hao walidai kuwa ukatili huo umekuwa ukiendelea kwa muda mrefu, na hawakuwa na jingine ila kuelezea changamoto zao kwa njia ya maandamano.

“Tumekuwa tukiteswa na hata kuuawa. Wengine wetu wana majeraha ya visu na hakuna hatua zozote ambazo huwa zinachukuliwa hata tukiripoti visa hivyo,” akalalamika Stephen Maina, mmoja wa wachuuzi hao.

Wachuuzi hao walikuwa wamepanga kuandamana kutoka mzunguko wa Globe na waelekee hadi Afisi ya Rais.

Kulingana na mmoja wa viongozi wao Bw Kim Waweru, maandamanao hayo yalichochewa na kisa cha hivi juzi, ambapo kijana mmoja aliyetambuliwa kama Mark Kyalo, alipigwa risasi na kuuawa na polisi kwa madai ya kuhusika katika wizi.

Huku wakiwa wamebeba mabango ya kukashifu dhuluma hizo, wachuuzi hao walionekana kukaidi juhudi za mkuu wa polisi wa Nairobi ya Kati Bw Patrick Oduma, aliyejaribu kuwahakikishia kuwa malalamishi yao yatachunguzwa na kutekelezwa.

“Tunamuomba yeyote aliye na habari kuhusu tukio hilo kujitokeza na kuandikisha taarifa katika kituo cha polisi,” Bw Oduma akawarai waandamanaji hao waliojawa na ghadhabu.

Gavana

Aidha, aliwaomba wachuuzi hao kuwachagua viongozi wawakilishi wawili ambao wangekutana na gavana wa Nairobi Dkt Kidero katika mkutano maalum wa kuangazia changamoto zao.

Hata hivyo, walikaidi agizo la mkuu huyo wa polisi kwa sharti kuwa hawangeshiriki katika mkutano huo ikiwa waliohusika katika mauaji hayo hawajakabiliwa kisheria.

Makabiliano hayo yalipelekea msongamano wa magari katika barabara ya Monrovia. Hakuna aliyeripitiwa kujeruhiwa katika makabiliano hayo.

TOA MAONI YAKO HAPA CHINI