MAANDALIZI YA LIVERPOOL KUMUUZA MSHAMBULIAJI SUAREZ YAANZA CHINI CHINI

KLABU ya Liverpool imeripotiwa kuanza kujiandaa na maisha bila ya straika wake, Luis Suarez, kwa sababu haitasita kumuuza Januari mwakani kama atahitaji kuondoka.

Straika huyo wa kimataifa wa Uruguay anayetajwa kuwa na thamani ya Pauni 50 milioni, kwenye uhamisho wa majira ya joto alikuwa akifukuziwa na Arsenal, lakini Liverpool iligoma kumuuza.

Lakini staa huyo aliyemaliza adhabu ya kufungiwa mechi 10 hivi karibuni iliyotokana na kosa la kumng’ata beki wa Chelsea, Branislav Ivanovic, amewaambia marafiki zake kwamba anataka kuamsha mpango mpya wa kuondoka Anfield wakati dirisha dogo la usajili wa Januari litakapofunguliwa.

Mshambuliaji huyo, mwenye umri wa miaka 26 alimwambia rafiki yake kwamba anataka kuondoka Liverpool na kwenda kujiunga na klabu ambayo itashindania mataji makubwa ikiwamo Ligi ya Mabingwa Ulaya.

Arsenal inatazamiwa kurudi na ofa yake ya kumnasa straika huyo, lakini ripoti zinabainisha kwamba straika huyo hatakubali kwenda Emirates kama miamba ya Hispania, Real Madrid itaingia kwenye mchakato wa kuhitaji saini yake.

Liverpool imedaiwa kwamba haitakuwa tayari kuendelea kupambana kumbakiza mchezaji huyo kama atahitaji kuhama kama alivyodai kwenye uhamisho wa majira ya kiangazi mwaka huu.

Suarez amewaambia marafiki zake wa karibu kwamba ataendelea kuboresha kiwango chake cha sasa ili kuzivutia timu kubwa.

TOA MAONI YAKO HAPA CHINI