AMISOM YATANGAZA KUANZISHA MASHAMBULIZI MAPYA NCHINI SOMALIA

Msemaji rasmi wa vikosi vya kulinda amani vya Umoja wa Afrika nchini Somalia AMISOM, ametangaza kushadidisha mashambulizi yake dhidi ya kundi la ash-Shabab na waungaji mkono wake katika maeneo ya kusini mwa Somalia.Ali Aden Houmud ameyasema hayo katika mkutano na waandishi wa habari mjini Mogadishu, mji mkuu wa Somalia na kuongeza kuwa, vikosi vya AMISOM vimekusudia katika siku zijazo kuanzisha operesheni kali kwa ajili ya kulitokomeza kundi hilo la ash-Shabab. Amesema, operesheni hizo zitajikita zaidi katika maeneo ambayo yanatajwa kutumiwa na kundi hilo kwa ajili ya kuendeshea harakati zake. Aidha Msemaji huyo rasmi wa vikosi vya kulinda amani vya Umoja wa Afrika nchini Somalia AMISOM ameonyesha kusikitishwa kwake na vita vya kikabila vinavyoendelea huko katika jimbo la Shabeellaha katikati mwa Somalia na kusisitizia juu ya udharura wa kurejeshwa hali ya usalama na amani baada ya miaka mingi ya vita na uharibifu mkubwa ambao umekuwa ukifanywa na makundi ya wabeba silaha nchini humo. Hii ni katika hali ambayo mji wa Mogadishu nao umekuwa ukishuhudia mashambulizi ya mara kwa mara yanayotekelezwa na wapiganaji wa ash-Shabab dhidi ya raia na viongozi wa serikali.

TOA MAONI YAKO HAPA CHINI