WAASI WA SUDAN KUSINI WAONYWA TENA VIKALI NA SERIKALI

Waziri wa Habari nchini Sudan Kusini ametangaza kuwa, ikiwa waasi hawatatekeleza mapendekezo yaliyotolewa na serikali ya Juba kwa ajili ya kusitisha mapigano, basi vikosi vya serikali hiyo vitaanzisha mashambulizi makali dhidi ya maeneo muhimu yanayodhibitiwa na waungaji mkono wa makamu wa zamani wa rais Bwana Riek Machar. Michael Makuei amesema kuwa, vikosi vya serikali pia vimefanikiwa kuwafurusha waasi katika mji wa Mayom katika jimbo la al-Wahda nchini humo. Ameongeza kuwa, ikiwa Riek Machar hatokubali kukomesha machafuko, basi vikosi vya nchi hiyo havitakuwa na budi ispokuwa kumfurusha kiongozi huyo wa waasi kutoka katika mji wa Bentiu. Ni vyema kuashiria hapa kwamba, mji wa Bentiu ndio makao makuu ya mwisho yanayodhibitiwa na askari wanaomuunga mkono Riek Machar aliyekuwa makamu wa rais wa Salava Kiir. Kwa upande mwingine Makuei amesisitiza kuwa, kazi ya usitishaji mapigano imebakia mikononi mwa kiongozi huyo wa waasi na kwamba serikali ya Sudan Kusini imeshafanya juhudi nyingi kwa ajili ya kuhakikisha jambo hilo linafikiwa. Hii ni katika hali ambayo Ijumaa iliyopita, serikali ya Juba ilitoa mapendekezo ya kusitisha mapigano sambamba na kuahidi kuwaachilia huru wanasiasa wanane kati ya 11 ambao wanashikiliwa na serikali ya Juba na vinara wa upinzani wa serikali na waungaji mkono wakubwa kwa Bwana Riek Machar.

TOA MAONI YAKO HAPA CHINI