SERIKALI YA LIBYA YAFIKIRIA KUANZA MPANGO WA KUSAFIRISHA MAFUTA KUPITIA BANDARI YA AL-HARIQA

Afisa mwandamizi mmoja katika Wizara ya Mafuta nchini Libya, amesema kuwa serikali ya Tripoli itaanza kusafirisha mafuta yake kupitia bandari ya Al Hariqa mashariki mwa nchi hiyo siku chache zijazo. Hatua hiyo inakuja baada ya kufikiwa makubaliano kati ya serikali na makundi ya wabeba silaha wanaoendelea kuzizingira bandari za kusafirishia mafuta za nchi hiyo. Kwa mujibu wa habari, watu hao wenye silaha walichukua hatua ya kuzingira bandari hiyo ya Al Hariqa tangu mwezi Agosti mwaka huu 2013 kwa shabaha ya kuishinikiza serikali ya Tripoli kuweza kutekeleza matakwa yao ya kisiasa na kifedha. Hata hivyo juhudi za serikali ya Libya kwa ajili ya kumaliza mzingiro huo dhidi ya bandari za kusafirishia mafuta, zimekuwa zikigonga mwamba na hivyo kutishia uchumi wa nchi hiyo ya kaskazini mwa Afrika. Wiki iliyopita umoja wa wafanyakazi wa mafuta na gesi nchini Libya, ulitangaza kwamba, kuna uwezekano wa kufikiwa makubaliano kati ya wapinzani na serikali ya nchi hiyo kuhusiana na mgogoro wa kufungwa bandari za mafuta, ulioanza tangu miezi kadhaa iliyopita. Hadi kufikia mwezi Novemba mwaka huu uzalishaji wa mafuta nchini humo ulikuwa umefikia kiwango cha pipa laki mbili na 24 elfu kwa siku huku kikiwa kimepungua mara dufu hadi sasa.

TOA MAONI YAKO HAPA CHINI