BADO MTANISUBIRI MTACHOKA...MTANIONA HIVI HIVI NANTAZIDI KUWACHANGANYA AKILI ZENU

STRAIKA wa Simba,kutoka hapa nchini Amissi Tambwe, ametamka kwamba Yanga watasubiri sana kipindi hiki, kwani Wekundu wa Msimbazi sasa ni habari nyingine kabisa. Kocha wake, Zdravko Logarusic, naye amekejeli akisema Yanga hawamuwezi na ataendelea kucheza na akili zao ili kuwapa vipigo.

Simba iliifunga Yanga mabao 3-1 juzi Jumamosi kwenye mechi ya Nani Mtani Jembe iliyochezwa Uwanja wa Taifa jijini Dar es Salaam.

Akizungumza na vyombo vya habari huku akicheka, Tambwe alisema: “Aisee kwa muziki huu tulionao sasa, Yanga watasubiri sana kwa sababu tumewazidi kila kitu, sisi ni wajanja. Mfano ni mechi ya Jumamosi, si umeona mwenyewe maana kila idara tuliwazidi, huwa wanatamba na mabeki wao wale, Yondani (Kelvin) na Cannavaro (Nadir Haroub) na siku ile tuliwapoteza kabisa.

“Ili uamini kwamba ilikuwa mechi mbaya kwao, ni ile kadi nyekundu aliyoonyeshwa Yondani. Katika mechi yoyote, ukiona mchezaji anapata kadi nyekundu ujue ni dalili tosha ya timu yake kuzidiwa, niliingia nikijiamini na niliamini naweza kufanya vile kama matokeo yalivyopatikana.

“Kasi yangu ndivyo itakavyokuwa kwa sababu nacheza na wachezaji ambao nao wanajua mpira vizuri, lakini kocha naye ni mzuri.”

Tambwe ambaye alifunga mara mbili katika mechi hiyo, pia ndiye kinara wa mabao kwenye msimamo wa Ligi Kuu Bara. Ana mabao 10.

Kocha wa Simba, Logarusic, ambaye muda wowote anatarajia kwenda kwao Croatia kwa mapumziko ya sikuku za Noeli na Mwaka Mpya, alisema: “Unajua tuliingia uwanjani lakini sehemu kubwa ya matumaini ya mashabiki walijua Yanga ndiyo itashinda na hata Yanga wenyewe walijua wanashinda.

“Nilichokifanya ni kucheza na akili zao nikawajenga wachezaji wangu kisaikolojia na kuwapa maelekezo, wachezaji nao walinielewa na tukafanikiwa. Niliwaambia wajiamini na wakinisikiliza mimi tutashinda, ndiyo ikawa vile.

“Pia mazoezi yalisaidia kwa kipindi chote tulichokuwa kambini, ndiyo siri kubwa ya mafanikio yetu, wachezaji ni wasikivu sana na walijua lazima tushinde kwa vile tumebezwa sana.”

Katika mchezo huo, Simba ndiyo ilitawala kwa kiasi kikubwa katika safu zote kuanzia beki iliyokuwa chini ya Joseph Owino raia wa Uganda, Mkenya Donald Musoti, Issa Rashid ‘Baba Ubaya’ na Haruna Shamte, wakati Jonas Mkude, Henry Joseph walicheza kiungo, Awadh Juma, Haruna Chanongo walicheza winga na washambuliaji wa kati walikuwa, Said Ndemla alicheza namba 10 na Tambwe.

Logarusic ambaye huwa hataki utani na kazi, alikuwa akimtoa kila mchezaji aliyeona analeta masihara au amezidiwa na alifanya hivyo kwa Ndemla, Henry, Awadh, Chanongo na Tambwe na kuwaingiza, Zahoro Pazi, Amri Kiemba, Ramadhani Singano ‘Messi’, Ramadhani Chombo Redondo ambaye naye hakuchukua muda nafasi yake ilichukuliwa na Abdulhalim Humoud.

TOA MAONI YAKO HAPA CHINI