KWA SASA TUMESHALITEKA JIMBO LA UNITY,NA AU YAJA JUU:Machar

Kiongozi wa waasi wa Sudan Kusini Riek Machar amesema kuwa, vikosi vyake vimefanikiwa kuchukua udhibiti wa jimbo muhimu la uzalishaji mafuta la Unity nchini humo. Makamu huyo wa zamani wa rais amedai kuwa, vikosi vyake ambavyo vinapambana na askari wa serikali vinadhibiti sehemu kubwa ya nchi hiyo. Kabla ya hapo pia jeshi la Sudan Kusini lilikuwa limetangaza habari ya kujiengua serikalini jenerali JamesKwang Chol aliyekuwa kiongozi wa kijeshi katika jimbo hilo la Unity nchini humo na kujiunga na waasi. Wakati huo huo Umoja wa Afrika umetaka kurejeshwa mara moja kwa usalama na amani nchini Sudan kusini, kufuatia mapigano makali yanayoendelea nchini humo na kuwepo uwezekano wa kuzuka vita vya ndani vya wenyewe kwa wenyewe. Habari kutoka Addis Ababa, Ethiopia zinasema kuwa, ripoti iliyotolewa na Umoja huo, imelaani vikali mauaji dhidi ya askari wa kulinda amani wa Umoja wa Mataifa na raia wasio na hatia, yaliyotekelezwa katika kambi moja ya Umoja wa Mataifa nchini Sudan Kusini na kutaka kusitishwa haraka mapigano nchini humo. Mapigano hayo yalizuka siku ya Jumapili iliyopita mjini Juba, ambao ni mji mkuu wa Sudan Kusini na kuenea katika maeneo mengine ya nchi hiyo. Aidha mapigano hayo yameyaingiza katika uhasama makabila mawili ya Nuer na Dinka ambayo nayo yameanzisha mapigano baina yao.

TOA MAONI YAKO HAPA CHINI