NYINGINE HELIKOPTA YA UN YASHAMBULIWA SUDAN KUSINI

Helikopta nyingine ya Umoja wa mataifa nchini Sudan Kusini, imeshambuliwa na kulazimika kutua kwa dharura. Viongozi wa Sudan Kusini wametangaza kuwa, ndege hiyo imeshambuliwa wakati ikitekeleza operesheni za kuwahamisha askari wa kulinda amani na raia katika jimbo la Jonglei nchini humo na kuisababishia hasara kubwa. Imeelezwa kuwa, baada ya ndege hiyo kushambuliwa kwa risasi na makombora na kutua kwa dharura, haikuweza tena kuruka kutokana na kuharibika. Kabla ya hapo pia ndege nyingine ya kijeshi ya Marekani ilishambuliwa wakati ikiwa katika operesheni kama hiyo huko Sudan Kusini na kusababisha askari watatu wa Marekani kujeruhiwa. Tayari jeshi la Marekani limethibitisha juu ya tukio hilo na kwamba, ndege hiyo ilishambuliwa na waasi wanaoipinga serikali ya Juba. Mapigano yalizuka siku ya Jumapili iliyopita huko mjini Juba, mji mkuu wa Sudan Kusini kati ya mirengo miwili hasimu ya jeshi na kuenea hadi maeneo mengine ya nchi na kusababisha mamia ya watu kuuawa.

TOA MAONI YAKO HAPA CHINI