RAIS MICHEL DJOTODIA AOMBA KUFANYIKA KWA MAZUNGUMZO CAR

Kwa mara nyingine Rais Michel Djotodia wa jamhuri ya Afrika ya Kati, ametaka kufanyika mazungumzo kati ya pande zinazogombana kwa ajili ya kumaliza machafuko nchini humo. Djotodia ambaye pia ni kiongozi wa zamani wa muungano wa waasi wa SELEKA na rais wa sasa wa serikali ya mpito ya Jamhuri ya Afrika ya Kati amesisitiza juu ya udharura wa kufanyika mazungumzo kati ya pande hasimu na hivyo kuikwamua nchi hiyo na hali ya mchafukoge inayoendelea hadi sasa. Aidha Rais Djotodia ameyataka makundi yote ya wabeba silaha yakiwemo yale ya kidini kuweka chini silaha zao na kufuata mkondo wa amani. Tangu mwanzoni mwa mwezi huu wa Disemba, mji mkuu wa nchi hiyo Bangui, umekuwa ukishuhudia mapigano makali yaliyopelekea karibu watu 1000 kuuawa. Hayo yanajiri katika hali ambayo ripoti kutoka mji mjini Bangui zinasema kuwa, shughuli katika mji huo zimeanza kurejea katika hali ya kawaida baada ya siku kadhaa za machafuko na mapigano yaliyozorotesha usalama na shughuli mjini hapo.

TOA MAONI YAKO HAPA CHINI