MTEREMKO WA ARSENAL WAANZA,NAFASI YA KWANZA WAMEITUPA NA LIVERPOOL SASA WANAISHIKILIA

ARSENAL imeshindwa kuiondoa Liverpool kileleni kwenye msimamo wa Ligi Kuu ya England na hivyo kukubali kuuachia rasmi usukani baada ya jana

Jumatatu usiku kushindwa kutamba mbele ya Chelsea baada ya kutoka sare ya bila kufungana kwenye Uwanja wa Emirates.

Sare hiyo inaifanya Arsenal kufikisha pointi 36 sawa na Liverpool, lakini ikizidiwa kwa mabao na hivyo kuishia kushika nafasi ya pili, lakini ikiwa

imepanda kwa nafasi moja baada ya wikiendi iliyopita kuporomoka hadi kwenye nafasi ya tatu kabla mechi yao hiyo.

Kitendo hicho pia kinaendelea rekodi mbovu ya kocha wa Arsenal, Arsene Wenger kushindwa kutamba mbele ya Jose Mourinho, anayeinoa klabu ya Chelsea.

Arsenal iliyokuwa nyumbani ilihitaji kuibuka na ushindi ili kurejea kwenye usukani wa ligi, lakini sasa matokeo hayo wanawafanya kukaribisha Krismasi wakiachia uongozi wa ligi na kuifanya Liverpool kutesa.

Kwa muda wote wa mchezo, timu hizo mbili zilicheza kwa tahadhali kubwa na kushambuliana kwa zamu huku kipindi cha kwanza, Chelsea ilionyesha kutaka ushindi baada ya mashambulizi makali ikiwamo tukio la kugongesha mwamba baada ya shuti la Frank Lampard.

Kilio cha Mourinho dhidi ya mastraika wake kushindwa kufunga bao lolote ugenini kwenye ligi msimu huu kiliendelea baada ya straika pekee aliyepata nafasi ya kucheza, Fernando Torres kushindwa kuonyesha cheche zake kabla ya kutolewa na nafasi yake kuingizwa beki Mbrazili David Luiz.

Kwenye kipindi cha pili, Arsenal walionekana kusaka ushindi na kutengeneza nafasi kadhaa za mabao, lakini walishindwa kuzitumia vizuri baada ya straika wake Olivier Giroud kukosa umakini.

Fowadi huyo Mfaransa alipata nafasi kadhaa za kufunga, lakini akashindwa.

Wakati Chelsea ikijivunia shambulizi la kugongesha mwamba, Arsenal nao chupuchupu watikise nyavu baada ya beki wa Chelsea kuokoa mpira kwenye mstari uliokuwa ukielekea wavuni na hivyo hadi filimbi ya mwisho matokeo yalikuwa sare ya bila kufungana.

TOA MAONI YAKO HAPA CHINI