SERIKALI YA ZIMBABWE YASEMA MATAMSHI YA ZWAMBILA NI POROJO

Jacqueline Zwambila balozi wa Zimbabwe nchini Australia

Serikali ya Zimbabwe imeyataja matamshi ya balozi wake nchini Australia kuwa yasiyo na maana yoyote. Hayo yamesemwa na Waziri wa Mambo ya Ndani wa Zimbabwe Kembo Mohadi na kusisitiza kuwa,  matamshi ya balozi wa nchi hiyo huko Australia  Bi Jacqueline Zwambila kwamba, Zimbabwe hakuna usalama, hayana maana na kwamba hakuna hatari yoyote dhidi ya maisha yake. Akiashiria kufungamana na chama cha upinzani cha MDC kinachoongozwa na Morgan Tsvangirai Waziri Mkuu wa zamani wa nchi hiyo na aliyeshindwa kwenye uchaguzi wa rais wa hivi karibuni nchini Zimbabwe,

Zwambila alisema kuwa, hawezi kurejea nchini humo kutokana na hatari inayoweza kuyakabili maisha yake. Aidha akishiria matamshi hayo ya Zwambila, Waziri wa Mambo ya Ndani wa Zimbabwe Kembo Mohadi, ameongeza kuwa, hadi sasa viongozi wote wa chama cha upinzani cha MDC wanaishi nchini humo huku wengine wakiwa wanatekeleza majukumu yao kama wabunge serikalini na hakuna hatari yoyote inayowakabili. Hivi karibuni balozi huyo wa Zimbabwe nchini Australia aliomba hifadhi ya ukimbizi nchini humo kwa madai kwamba, haoni sababu ya kurejea nyumbani baada ya chama cha ZANU PF nchini Zimbabwe kufanya udanganyifu mkubwa katika uchaguzi mkuu uliofanyika tarehe 31 Julai mwaka huu na kwamba, maisha yake yatakuwa hatarini iwapo atarejea nchini humo.

TOA MAONI YAKO HAPA CHINI