AJALI KUBWA YATOKEA HUKO KENYA YA LORI LA MAFUTA KUANGUKA NA KULETA MSONGAMANO KWENYE BARABARA YA MOMBASA ROAD

MAMIA ya wasafiri walikwama barabarani na wengine walilazimika kugharamia zaidi usafiri Alhamisi asubuhi baada ya lori la mafuta kuanguka katika eneo la General Motors (GM) na kufunga njia kwa watu wengi wanaotumia barabara ya Mombasa kuelelekea maeneo ya katikati mwa jiji na kwingineko.

Watu waliokuwa wakielekea maeneo ya Uwanja wa Ndege wa Kimataifa wa Jomo Kenyatta, Kitengela na Machakos pia waliathiriwa baada ya barabara hiyo kuanza pia kutumiwa na magari yaliyokuwa yakielekea jijini.

Hata hivyo, lori hilo lilifanikiwa kuondolewa barabarani baada ya zaidi ya masaa matano tangu lilipoanguka.

“Lori lilianguka mwendo wa saa kumi usiku likiwa na mafuta ghafi ya kutengezea mafuta ya kupikia.Dereva aliumia na kupelekwa hospitalini. Gari hilo lilionekana kupoteza mwelekeo,” Kamanda wa Trafiki Samuel Kimaro alisema.

Aliongeza, “Ilituchukua masaa mengi kuondoa trela hilo kwa kuwa lilikuwa na uzito mkubwa. Kila kreni iliyokuja ilikuwa inashindwa. Na hatimaye tulipoindoa, tulikumbana na tatizo lingine la mafuta yaliyokuwa yamemwagika na kufanya barabara kuteleza mno. Tulijitahidi kusafisha barabara na sasa hali ni shwari, shughuli zinaendelea kama kawaida.”

Matatu nyingi zilitumia msongamano huo kuongeza nauli, baadhi zikitoza Sh150 na Sh200 kutoka Mlolongo kuelekea jijini ilhali kawaida safari hiyo huwa kuanzia Sh40 hadi Sh80.Nyingine ziliamua kufanya safari fupi na kuwafikisha abiria mahali msongamano wa magari ulionekana kufika.

Idadi kubwa ya watu ilionekana kutamaushwa na nauli hiyo na walionekana wakiwa wamesimama kwenye steji mbali mbali.

Hata hivyo, abiria wengi pia walionekana kushuka  kutoka magari hayo hata baada ya kulipa na kuamua kutembea baada ya kusubiri kwa muda wa zaidi ya saa moja bila magari hayo kusongea.

Gari moshi la Syokimau pia lilishuhudia msongamano mkubwa wa watu katika treni zake mbili za saa moja na saa tatu, baada ya watu wengi kuamua kuliabiri ili kukabiliana na msongamano huo.

Bi Ann Muteti, alisimulia kusubiri steji kwa muda mrefu kuanzia saa moja bila kupata gari kabla ya kuamua kuelekea kwa kituo cha reli cha Syokimau, kusafiri na treni ya saa tatu.

Nao wahudumu wa bodaboda walifanya biashara kubwa wakisafirisha abiria ambao walihisi kuchelewa kazini ama waliokuwa wakielekea kwa sehemu za karibu kama  Cabanas na GM.Wengine wanaofanya kazi katika maeneo ya karibu kama Cabanas ambapo kawaida wao hutozwa Sh20 kutoka Mlololongo na Syokimau, waliamua kutembea ili wasichelewe kazini.

Msongamano huo pia ulifanya Halmashauri ya Viwanja vya Ndege Kenya (KAA) kutoa tahadhari kupitia kwa mtandao wa twitter kwa wenye safari za ndege kuanza kuelekea huko mapema.

Tukio hilo pia lilisababisha msongamano kwenye barabara nyingine baada ya wenye magari kujaribu kuhepa Mombasa Road, na kutumia ya Outering, Jogoo na Enterprise.

TOA MAONI YAKO HAPA CHINI