LICHA YA KUNUNULIWA MAMILIONI ILA HAKUNA AMBACHO ALISHA BADILISHA KWAO,WAZAZI WAKE BADO WAISHI KIMASKINI

LICHA ya umilionea wake mkubwa unaoongezeka kila kukicha kutokana na mafanikio yake makubwa katika soka, wazazi wa staa wa Real Madrid, Gareth Bale wameendelea kuishi katika nyumba yao ya kimaskini jijini Cardiff.

Si kwa sababu ya tabia za uchoyo za staa huyo, hapana, Bale si mchoyo, lakini wazazi wake wenyewe wamemkatalia kuhamia katika nyumba ya kifahari aliyowanunulia kwa sababu wanapenda kuendelea kukaa katika nyumba ya kota.

Bale, ambaye ni mwanasoka ghali zaidi duniani baada ya kuhamishwa kwa kiasi cha Pauni 85 milioni kutoka Tottenham Hotspur kwenda Real Madrid katika usajili wa kipindi cha majira ya joto cha mwaka jana alisema angewapatia wazazi wake, Frank na Debbie kiasi cha Pauni 1 milioni kwa ajili ya kutafuta jumba la kifahari la kununua na kutimiza ndoto zao za kuishi maisha mazuri.

Lakini wazazi hao walimwambia Bale (24), kwamba wamezoea na kusikia raha kuishi katika nyumba yao ya vyumba vitatu ambayo Bale alikulia kabla ya kuibuka kuwa mchezaji ghali duniani.

Debbie (50), alimwambia rafiki wa familia yake hiyo kwamba kitendo cha Gareth kuwapa ofa ya nyumba kilikuwa cha huruma na kizuri, lakini wanapenda kuendelea kuishi walipo huku wakiwa na majirani wazuri waliowazoea.

Yeye na mumewe, Frank (54),  ambaye ni mstaafu wa shule moja jijini humo, walinunua nyumba hiyo ya kawaida kwa kiasi cha Pauni 12,000 miaka 30 iliyopita kabla ya Bale hajazaliwa na kwa sasa nyumbani hiyo ina thamani ya Pauni 170,000.

Ni hapo ndipo walipomlea Bale na dada yake, Vicky huku Bale akijifunza kucheza soka katika bustani iliyopo kando ya nyumba hiyo na kuharibu mali za watu.

Baada ya kupatiwa kiasi hicho cha pesa na Bale kwa ajili ya kusaka nyumba, yeye na mumewe walienda kutafuta nyumba ya kifahari katika eneo la Vale of Glamorgan. Vile vile walitafuta nyumba yenye thamani ya Pauni 415,000 karibu na eneo la wanaloishi.

Hata hivyo, mwishowe waliamua moja kwa moja kubaki katika nyumba yao waliyoishi kwa miaka 30 iliyopita ambayo inaashiria historia yao huku wakigoma kuwaacha majirani zao wenye upendo wa dhati kwao.

Debbie alimwambia rafiki yake mmoja kuwa wanapata kila wanachokitaka kwa kuwa hapo na itakuwa jambo gumu kwao kuhama katika nyumba ambayo watoto wao walikulia.

Jirani yao, Bill Tout anasema kwamba amefurahi kwa majirani zake hao kuamua kubakia katika nyumba hiyo kwa sababu ni watu wema na wamezoeana kwa muda mrefu.

“Frank na Debbie ni watu wazuri sana na ni majirani bora. Mambo hayatakuwa mazuri kama wakiamua kuondoka zao,” alisema Tout, ambaye ni mjane mwenye umri wa miaka 82.

Bale bado ana upendo mkubwa kwa wazazi wake na Septemba mwaka jana walikuwa katika Uwanja wa Santiago Bernabeu wakati mtoto wao akitambulishwa kwa mashabiki wa timu hiyo huku akikabidhiwa jezi namba 11 na Rais wa Real Madrid, Florentino Perez. Hata hivyo, Bale mwenyewe anaishi katika jumba la kifahari lenye thamani ya Pauni 6.5 milioni ambalo analipia Pauni 10,000 kwa mwezi huku majirani zake wakiwa ni pamoja na staa wa timu yake, Cristiano Ronaldo na mwigizaji maarufu wa kike wa Hollywood, Penelope Cruz.

Winga huyo anayeingiza kiasi cha Pauni 300,000 kwa wiki anaishi pamoja na mpenzi wake wa muda mrefu, Emma Rhys-Jones na mtoto wao mwenye umri wa miezi 15.

Mara kadhaa Bale amekuwa akionekana katika vitongoji vya Cardiff akiwa anawatembelea wazazi wake na pia rafiki zake wa utotoni.

Inadaiwa pia kuwa Debbie na Frank waliingiza kiasi cha Pauni 2 milioni katika uhamisho wa staa huyo wa Wales ambapo wote wawili pamoja na mtoto wao, Gareth ni Wakurugenzi wa kampuni yao binafsi waliyoianzisha, Primesure Limited ambayo ilinufaika na uhamisho huo. Mtu mmoja wa karibu alinukuliwa na gazeti la The Mirror la Uingereza akisema kwamba pesa hizo ni kama zawadi kutoka kwa Bale ambaye alitunzwa vilivyo na wazazi hao mpaka kuibuka kuwa mmoja kati ya wachezaji mahiri duniani.

“Gareth hajasahau alikotoka. Ni kijana mwaminifu. Kipaumbele chake ni familia yake na tangu awe mchezaji mahiri wa kulipwa amehakikisha wanapata kila kitu. Gareth anashukuru kwa kila alichofanyiwa na wazazi wake wakati akiwa mchezaji chipukizi.”

“Mama yake Debbie alikuwa na hamu kubwa kuona dili ya kwenda Hispania inafanikiwa kwa sababu yeye na Frank walikuwa sehemu ya dili hilo.”

TOA MAONI YAKO HAPA CHINI