MIMI SIENDI POPOTE BADO NIPO STAMFORD BRIDGE:EDEN HAZARD

KIUNGO, Eden Hazard amesema hana mpango wa kuihama Chelsea iwe mwezi huu au mwisho wa msimu kwa sababu ametosheka na maendeleo yake klabuni hapo.

Hazard anafahamu wazi uvumi uliozagaa kuhusu hatima yake, huku jina lake likihusishwa na matajiri wa Ufaransa, Paris Saint-Germain (PSG), wanaoripotiwa kuiwinda huduma yake kwa nguvu nyingi. Lakini, staa huyo wa Ubelgiji alisema anatambua anachokifanya na kilichopo akilini kwake kwa sasa ni kuendelea kutoa huduma safi kiuchezaji.

Kocha Jose Mourinho amekiri kuvutiwa na kiwango cha staa huyo na kusema kwamba ni moja ya silaha zake muhimu katika msimu huu.

“Kila kinapofika kipindi cha usajili, watu wananiambia nitahama Chelsea. Imezoeleka kutajwa Paris Saint-Germain. PSG ni klabu kubwa, lakini naipenda Chelsea na hakuna uwezekano wowote kwangu kuhama mahali hapa iwe Januari au mwisho wa msimu. Chelsea ni mahali pazuri sana kwangu,” alisema Hazard.

TOA MAONI YAKO HAPA CHINI