SOMA ALICHO KISEMA MCHEZAJI MATA KWA MASHABIKI WA MANCHESTER UNITED

JUAN Mata amesema ametua Manchester United kwa kazi moja tu; kunyakua taji la Ligi Kuu England. Kabla hajamaliza, akamwambia kocha David Moyes kwamba awe huru kumpanga popote pale ilimradi tu iwe kwenye goli la wapinzani.

Anasema: “Nilikuwa nacheza kushoto nilipojiunga Chelsea, msimu huu nilichezeshwa kulia na msimu uliopita, ambao ulikuwa bora kabisa katika maisha ya soka langu, nilicheza nyuma ya mshambuliaji wa kati. Lakini, mi sijali kitu, ilimradi niweke tu uwanjani nicheze utaona mambo yangu.”

Akizungumza kwa mara ya kwanza akiwa mchezaji wa Manchester United, kiungo huyo Mhispaniola anasema aliposikia David Moyes anamtaka ajiunge Manchester United, kwanza alishusha pumzi na kisha kuona hiyo ni nafasi yake ya kwenda kubeba ubingwa wa Ligi Kuu England.

Mata anasema alipopata taarifa hizo akaanza kuchati na Mhispaniola mwenzake, David de Gea, ambaye ni kipa wa miamba hiyo ya Old Trafford.

Anasema: “David de Gea alinitumia meseji siku chache zilizopita na kusema, ‘unakuja lini, utatua lini?’” kabla hajanitania kwa kusema “unakuja kwa helikopta au kwa baiskeli?”.

Staa huyo ambaye ametua Old Trafford kwa pauni 37.1 milioni, amesema hatishwi na dau kubwa alilohamishiwa na kwamba atakachofanya yeye ni kuonyesha vitu uwanjani.

Mata anatazamiwa kucheza mechi yake ya kwanza Manchester United leo Jumanne usiku wakati klabu hiyo itakapomenyana na Cardiff City kwenye Ligi Kuu England.

“Nafahamu dau nililohamishiwa ni kubwa, lakini mimi najiamini na nina uhakika mkubwa nitafanya vizuri,” anasema.

“Nitajaribu na siku zote ndivyo nilivyo. Kikosi pamoja na kocha wote wazuri na mashabiki wa timu hii ni wa kipekee sana. Hakika tuna kila kitu cha kutufanya tufanikiwe. Niliposikia Manchester United inanitaka, nikasema ‘Wow’. Hii ni timu iliyotwaa mataji mengi na yenye historia kubwa kwenye Ligi Kuu England na soka la nchi hii kwa jumla. Ni heshima kubwa kwa klabu kama Manchester United kuona inakutaka. Najisikia vizuri sana.”

Juzi Jumapili, uwanjani Stamford Bridge mashabiki wa Chelsea walibeba mabango kumshukuru staa huyo kwamba wataendelea kumkumbuka na wamempa asante kwa huduma ya nguvu aliyowapatia kwa kipindi chote alichokuwa kwenye klabu hiyo.

“Nipo hapa Manchester United kwa sasa na nina furaha kwa jambo hilo, nimekutana na David ni rafiki yangu mzuri sana na hakuna ubishi jamaa ni kipa wa ukweli. Yeye amechangia sana mimi kuja hapa,” anasema Mata.“Lakini, kwa mchezaji ambaye unapenda kufunga mabao, kutengeneza na kuonyesha ufundi huwezi kugoma kwenda kwenye timu utakayocheza pamoja na Wayne Rooney, Robin van Persie, Adnan (Januzaj), (Antonio) Valencia, Chicharito (Javier Hernandez) na (Danny) Welbeck. Hawa ni wachezaji wa viwango vikubwa na nitakachojaribu ni kuonyesha uwezo wangu kwa ajili ya kusaidia timu.”

TOA MAONI YAKO HAPA CHINI