SOMA KISA CHA SHABIKI ALIEOMBA NAMBA YA MZEE SIR ALEX FERGUSONI

AMECHOSHWA. Ni hivyo baada ya shabiki mmoja wa Manchester United aliyeripotiwa alikuwa amelewa kuamua kupiga simu polisi na kuomba apatiwe namba ya simu ya kocha wa zamani wa kikosi hicho, Sir Alex Ferguson ili ampe yake ya moyoni.

Polisi wa Greater Manchester wamedai kwamba walipokea simu ya shabiki huyo kupitia kwenye namba ya dharura ya 999 akiomba apatiwe namba ya Ferguson azungumze naye baada ya Man United kutupwa nje na Sunderland kwa mikwaju ya penalti katika mechi ya nusu fainali ya Kombe la Ligi Jumatano iliyopita.

Jambo hilo liliwafanya polisi hao kuwakumbusha kwamba namba 999 ni kwa ajili ya huduma ya dharura tu na si kwa matumizi mengine kama yaliyofanywa na shabiki huyo, aliyedaiwa kuwa alikuwa amelewa. “Jana usiku (Jumatano iliyopita), saa 4.30 usiku saa za hapa mtu mmoja kutoka Crumpsall alipiga simu kwenye namba 999 alikuwa kwenye hali ya ulevi na kuomba azungumze na Sir Alex Ferguson baada ya matokeo ya mechi,” ilibainisha taarifa hiyo ya polisi iliyowekwa kwenye ukurasa wao wa Facebook.

“Sawa, ni hali ya kawaida kwa shabiki hasa timu yako inapopoteza mchezo, lakini tunataka kuwakumbusha namba 999 ni ya dharura. Kwa mahitaji mengine ambayo si ya dharura, namba inayoruhusiwa ni 101.”

Polisi hao waliwapa ushauri mashabiki wa Man United wakitaka kuzungumza na Ferguson basi wanapaswa kupiga simu moja kwa moja kwenye klabu hiyo na si polisi.

TOA MAONI YAKO HAPA CHINI