TEHRAN YATEMBELEWA NA KATIBU MKUU WA ZAMANI WA UMOJA WA MATAIFA BWANA KOFI ANNAN

Katibu Mkuu wa Zamani wa Umoja wa Mataifa Kofi Annan  amewasili Tehran kwa lengo la kufanya mazungumzo na maafisa wa ngazi za juu wa Iran kuhusu masuala kadhaa ya kieneo.

Annan ambaye ni mwenyekiti wa Taasisi ya Jopo la Wazee aliwasili Tehran Alfajiri ya leo Jumapili akiwa ameandamana na rais wa zamani wa Finland Aartti Ahtisaari ambaye pia ni mwanachama wa jopo hilo . Wanachama wengine wa Jopo la Wazee ni Kasisi Desmond Tutu wa Afrika Kusini na rais wa zamani wa Mexico Ernesto Zedillo na wanatazamiwa pia kuwasili Tehran baadaye.  Annan amenukuliwa akisema lengo la safari ya siku tatu ya jopo hilo Iran ni 'kuhimiza na kuboresha roho ya uwazi na mazungumzo baina ya Iran na jamii ya kimataifa sambamba na kutafuta njia muafaka za kuimarisha ushirikiano katika masuala ya kieneo.' Aidha amesema 'Jamhuri ya Kiislamu ya Iran ina nafasi muhimu katika kudhamini uthabiti Mashariki ya Kati.' Taarifa katika tovuti ya jopo hilo inasema kutafanyika mazungumzo na maafisa wa Iran kuhusu njia za amani za kusuluhisha migogoro na  uhasama wa kimadhehebu Mashariki ya Kati. Jopo la Wazee ni taasisi isiyo ya kiserikali iliyoundwa mwaka 2007 kufuatia pendekezo la rais wa zamani wa Afrika Kusini hayati Nelson Mandela. Wanachama wa jopo hilo ni watu ambao wamewahi kushika nafasi muhimu za uongozi katika nchi mbali mbali duniani.

TOA MAONI YAKO HAPA CHINI